Glosa Wiki
Advertisement
Plu akti de plu apostola
ge-translati ex Gary Miller (USA, 2003)


1

1 O Teofilo: veri, mi pa face u proto nara; Jesu pa proto face e doci 2 a di; tem qi An gene leva po dona komanda per Sankti-Spiritu a panto Apostola [ge-bali-pe]; An pa elekti. 3 An pa monstra vive Se a mu per poli verifi, po An pa gene algo, tem gene vide tetra-ze di e tem dice plu ra de Teo regi-landa. 4 Tem es ko mu, An pa dice u komanda: "Ne ki ab civita Jerusalem, anti-co atende Patri promise; vi audi ex Mi, 5 "Veri, Joane pa akti bapti-ritu. Vi fu gene bapti-ritu per Sankti-Spiritu po oligo di." 6 Veri, mu, po simul veni, dona qestio tem dice: "Cefa: qe Tu nu re-face u regi-landa Israel?" 7 An dice a mu: "U ski de plu tem; Patri pa moti ad Auto arki, es ne de vi. 8 "Anti-co vi fu gene dina po Sankti-Spiritu veni epi vi. Vi fu es plu testi-pe pro Mi in civita Jerusalem e in panto landa Juda e Samaria e a maxi tele de geo." 9 Po dice panto-ci tem mu skope, An gene leva. U nefo sti apo An ab oku. 10 Tem vide ko tende ad urani tem An ki, vide: bi andro in leuko vesti sta para mu. 11 Mu dice: "Vi Galilaia-pe: qo-ka vi du sta tem skope ad urani? U-ci Jesu; Qi pa gene leva ab vi ad urani, fu veni per homo mode; vi pa vide An ki ad urani." 12 Kron mu ki versi civita Jerusalem ab monti; ge-nima Olivi e qi es proxi civita Jerusalem--u tele de sabato-di iti. 13 Po ki in, mu ki ad-in supra kamera, topo du es Petro ko Jakob ko Joane kon Andre, e Filipo ko Toma, e Bartolomai ko Matai, e Alfai fili Jakob ko zelo-pe Simon, e Jakob fratri Juda. 14 Panto-ci dura kon akorda per preka e per humili ko plu gina e ko Jesu matri Maria e ko Jesu fratri.

15 Tem plu-la di po sta meso plu sko-pe--u numera de nima simul es hekto-bi-ze--Petro dice: 16 "Plu asocia vi: pa es nece: u-ci grafo pa gene reali; Sankti-Spiritu pa pre-dice per David stoma de Juda; qi pa es u duce-pe pro plu-la; qi akti rapi de Jesu. 17 "An pa es ko na in grega e pa kon-akti u servi"-- 18 Veri, u-ci pa gene un agri ex no-justi gratia-ra. Po kade, an gene explode in meso, ko-co panto entero fo fusi ex. 19 Panto-pe; qi du eko in civita Jerusalem pa gene ski, so id gene per auto lingua u nima Akeldama; qi es Hema Agri. 20 "Es ge-grafo in bibli Kanta: '+Lase; un eko-lo fu es solo, e lase; nuli-pe fu eko in id,+' e '+Lase; un hetero-pe fu cepti an supra-visi.+' [Kanta 69:25; 109:8] 21 "Ka-co mo ex plu andro; qi pa akti ko na holo-tem; tem qi na Cefa Jesu pa ki in e ki ex inter na 22 "proto po Joane bapti-ritu a di; tem qi An gene leva ab na, fu nece es u testi-pe de ana-sta ko na." 23 Mu moti ante bi, Josef; ge-nima Barsaba e qi habe un adi nima Justo, e Matia. 24 Tem akti preka, mu dice: "Cefa Tu; Qi habe ski de panto-pe psiko: monstra mo ex bi-ci; Tu pa elekti 25 "te cepti u mero de servi e de Apostola ergo; Juda pa lose tem akti anti e tem ki ad auto loka." 26 Mu dona plu elekti. Un elekti gene a Matia. An es in grega de mo-mo Apostola.

2

1 Tem u di Pentekoste gene sati, panto mu es kon akorda topo iso loka. 2 Ko subito, u soni; homo fo tako venti, ki ex urani e face ple un holo domi; topo mu sedi. 3 Plu ge-skizo flama monstra se e sedi epi singu mo de mu. 4 Panto mu gene ple per Sankti-Spiritu, ko-co mu proto dice per plu hetero lingua akorda ra; Sankti-Spiritu pa dona a mu te dice. 5 Es plu Juda-pe; qi du eko in civita Jerusalem--plu religio homi ex panto demo infra urani. 6 Po u soni de u-ci pa gene acide, u poli-pe simul veni e gene konfusi, ka panto-pe audi loqi per auto lingua. 7 Panto-pe gene mira e dona u qestio tem dice ad alelo: "Vide! Qe panto-pe; qi dice, ne es plu Galilaia-pe? 8 "Na audi; panto homi dice per auto lingua; in qi na pa gene nati, per qo mode: 9 "Homi ex Parto, Medo, Elam, homi; qi du eko in landa Mesopotami, Juda, Kapadocia, Ponto kon Asia, 10 "Frigia ko Pamfilia, Egipto ko plu mero de landa Libia proxi landa Kirena, e Roma-pe ko Juda-pe ko religio-muta-pe; qi du resta ci, 11 "Kreta-pe kon Arabi-pe? Na audi; mu dice plu mega ra de Teo per auto lingua." 12 Panto-pe este mira e este konfusi tem dice ad alelo: "U-ci posi es qo-ra?" 13 Hetero dice ko ridi: "Mu es ple per neo vini!"

14 Tem sta, Petro ko Mo-mo sti voka e dice: "Juda-pe ko panto vi; qi du eko in civita Jerusalem: u-ci gene ski a vi, ko-co dona audi a mi verba. 15 "Panto-ci homi es narko ne sio es vi doxo--es un horo tri de la di. 16 "U-ci es u ra; profeta Joel pa dice: 17 "'+Fu es tem plu ultima di'--Teo dice--'Mi fu fusi Spiritu epi panto homi, ko-co vi an-fili e fe-fili fu pre-dice, ko-co vi juve homi fu vide idio vista, e paleo homi fu vide sonia. 18 "'+Mi fu fusi Spiritu klu epi an-dulo e fe-dulo tem plu-la di, ko-co mu fu pre-dice. 19 "'+Mi fu dona supra in urani plu mira e infra epi geo plu sema; hema e piro e vapo de fumi. 20 "'+Un heli fu es skoto e u luna hema, pre u mega e evide di de na Cefa fu veni. 21 "'+Fu es: ali-pe; qi voci u nima de na Cefa, fu gene salva.+' [Joel 2:28-32] 22 "Israel-fili vi: sti audi de panto-ci verba: Teo pa dona a vi un Homi, Nazaret-Pe Jesu, per dina e per mira e per sema; Teo pa akti per An inter vi akorda u ra; de qi vi auto habe ski-- 23 "An; ge-dona per decide e per pre-ski de Teo, po vi pa rapi per minus-lega manu e po cide An per kruci-ra-- 24 "An; Teo pa leva po face laxa plu algo de morta, ka u tena per id ne es posi. 25 "David dice de An: '+Mi pre-vide u Cefa ante mi panto-tem, ka An es para mi dextro, so mi ne fu gene seiso. 26 "'+Ka-co mi psiko pa dice hedo e mi glosa honora, plus-co mi soma habe relaxa in spe, 27 "'+ka Tu ni fu lase mi psiko in tortu-lo ni fu dona Tu sankti-Pe te vide sapro. 28 "'+Tu face ge-ski a mi plu via de vive. Tu fu face ple per hedo mi ante Tu facia.+ [Kanta 16:8-11] 29 "Relatio-pe: lase; mi dice a vi ko libe de na patri-arki-pe David: An pa gene morta e gene in-tera. An tafo es inter na a nu-di. 30 "Tem es u profeta e tem habe u ski; Teo pa dice u jura te leva Kristo homo karpe de An soma e homo un Homi te sedi epi regi-mo. 31 "Tem pre-vide, an dice de un ana-sta de Kristo; An psiko ne pa es ge-lase in tortu-lo e An soma ne pa vide sapro. 32 "Teo pa leva u-ci Jesu; de qi panto na es plu testi-pe. 33 "Po gene honora per Teo dextro manu e po gene u promise de Sankti-Spiritu ex Patri, An pa dona u-ci; vi nu vide e nu audi. 34 "David ne pa ki a plu urani. An auto dice: '+Mi Cefa dice a mi Cefa: "Sti sedi para dextro, 35 "'"+a-kron Mi moti plu anti-pe homo pedi-mo pro pedi."+' [Kanta 110:1] 36 "Ka-co dona ko sura a panto Israel-fili u ski; Teo pa face na Cefa e Kristo An, u-ci Jesu; vi pa cide epi kruci-ra."

37 Po audi, mu este etio in psiko e dice a Petro e a plu hetero Apostola: "Na fu akti qo, relatio-pe?" 38 Petro dice a mu: "Sti penite, ko-co panto vi gene bapti-ritu ko nima Jesu Kristo te apo peka. Vi fu gene u doro de Sankti-Spiritu. 39 "U promise es a vi e a vi fili e a panto-pe in tele--a panto-pe; qi dona a Teo u nima Cefa." 40 An dice testi e spe ko plu hetero verba tem dice: "Gene salva ab plu mali homi de nu-tem." 41 Mu; qi gene plu verba kon hedo, gene bapti-ritu. Cirka tri-kilo psiko gene adi tem u-ci di. 42 Mu dura kon Apostola doci ko plu asocia e ko mero de pani ko preka. 43 Fobo sti ki in panto psiko. Poli mira e sema gene acide per plu Apostola. 44 Panto-pe; qi habe kredi, es kon alelo e habe komuni panto-ra. 45 Mu vendo plu habe-ra e idio-ra e mero mu a panto-pe akorda ra; ali-pe habe u nece. 46 Mu es in Religio-do kon akorda tem panto-ci di. Tem mero de pani in domi, mu vora sito kon hedo e kon unio 47 tem dice lauda a Teo a tem habe favo a panto-pe. Na Cefa adi panto-pe; qi gene salva, a grega tem panto-ci di.

3

1 Petro ko Joane ki a Religio-do kron horo de preka--un horo nona. 2 Tem es klaudi ex matri uteri, u certa andro; pe moti para Religio-do porta; ge-nima Kali, gene fero panto-di te dice petitio de doro a plu homi; qi ki ad-in Religio-do. 3 Kron vide; Petro e Joane nu-fu ki ad-in Religio-do, an dice petitio te gene doro. 4 Tem vide ad an ko tende, Petro ko Joane dice: "Sti vide a na." 5 An dona kura, tem atende; gene uno-ra ex mu. 6 Petro dice: "Ne es ko mi argenti alo kriso. Mi dona a tu u ra; mi habe: per u nima de Nazaret-pe Jesu Kristo, sti sta e gresi." 7 Po prende dextro manu, an leva an. An pedi e pedi artri imedia gene forti. 8 Po salta, an sta e gresi e ki ad-in Religio-do ko mu tem gresi e salta e dice lauda a Teo. 9 Panto homi vide an tem gresi e dice lauda a Teo. 10 Mu rekogni; es an; qi sedi kausa doro proxi porta Kali de Religio-do. Mu gene ple ko mira e kon excite de ra; qi pa acide. 11 Tem u ge-repara-pe tena Petro e Joane, panto homi simul dromo ko mira epi portika; ge-nima De Solomon.

12 Po vide, Petro reakti a plu homi: "Israel-pe: vi este mira de u-ci qo-ka alo qe skope na, homo na pa face; an du gresi, per na idio dina alo sankti? 13 "Teo de Abraam e de Isaak e de Jakob, Teo de na patri, pa dona glori a servi-Pe Jesu; vi pa dona ab e de Qi vi pa dice nega ante Pilato, po an dice u decide; an fu dona libe. 14 "Vi dice nega anti u sankti e justi Homi e dice u petitio; an dona a vi u cide-pe. 15 "Vi pa cide un arki-Pe de vive; Teo pa leva ex panto morta-pe; de qi na es testi-pe. 16 "Per fide de An nima, An nima pa face forti u-ci; vi vide e de qi vi habe ski. 17 "Relatio-pe vi: mi nu habe u ski; vi pa akti ko ne-ski--plus plu arki-pe de vi. 18 "Per-co Teo pa face reali u ra; Teo pa pre-dice per stoma de panto profeta: Kristo fu gene sufero. 19 "Ka-co este penite e gene muta ad apo de vi peka, te plu kron de re-fresko fu veni ab na Cefa loka 20 "e te An fu bali An; Qi pa gene voci a vi, Jesu Kristo. 21 "Veri, un urani nece cepti An pre plu kron de versi de panto-ra; Teo pa dice per stoma de panto sankti profeta de plu paleo tem. 22 "Veri, Moses pa dice a plu patri de na: '+Na Cefa, vi Teo, fu leva a vi u Profeta homo mi ex plu relatio-pe. Sti audi akorda panto ali-ra; An fu dice a vi. 23 "'+Fu es: panto psiko; qi ne audi u Profeta, fu gene destru ab plu homi.+' [Nomi-Bi 18:15,18,19] 24 "Panto profeta de e seqe Samuel pa pre-voci panto-ci di. 25 "Vi es plu fili de plu profeta e de testi-ra; Teo pa dona a plu patri de na, tem dice ad Abraam: '+Panto demo de geo fu gene bene per tu fili.+' [Gene-Nati 22:18; 26:4; 28:14] 26 "Po leva Auto servi-Pe Jesu, Teo pa bali An proto a vi tem dice bene pro vi per face u tropi de panto vi ab kako."

4

1 Tem mu dice a panto-pe, plu hiera e u hiera cefa e plu Sadukai-pe veni 2 tem este turba, ka mu dice doci a panto-pe e voci ana-sta per Jesu ex panto morta-pe. 3 Mu rapi per manu e moti mu ad-in tena-lo a mana. Nu es vespera. 4 Poli homi; qi pa audi u dice, gene kredi. U numera de andro es cirka penta-kilo. 5 Acide: kron mana, plu arki-pe e plu krati-pe e plu religio-tekno-pe kolekti se in civita Jerusalem 6 ko cefa-hiera Ana ko Kaiafa e Joane e Alexandro e panto ex cefa-hiera famili. 7 Po duce mu a meso, mu dice u qestio: "Vi pa akti u-ci per qo dina alo per qo nima?" 8 Tem ple per Sankti-Spiritu, kron Petro dice a mu: "Arki-pe vi de panto na e arki-pe vi de landa Israel: 9 "Si na nu gene examina de boni ergo a pato-pe e de ra; per qi an pa gene sani, 10 "gene a vi e a panto-pe in landa Israel u ski; per u nima de Jesu Kristo; Nazaret-pe, Qi vi pa cide epi kruci-ra e Teo pa leva ex morta-pe--u-ci es sani ante vi per An. 11 "U-ci es +U Lito; tekto-pe vi no-cepti e Qi gene es u cefa gono-Li.+ [Kanta 118:22] 12 "Es salva per zero hetero-Pe, ni es infra urani u nima; qi gene dona inter homi e per qi na nece gene salva." 13 Tem vide u no-fobo de Petro e de Joane e po gene un este; mu es plu ne-ge-sko e ne-ski andro, mu este mira e gene u rekogni; mu pa es ko Jesu. 14 Tem vide; u ge-sani andro du sta, mu dice nuli-ra. 15 Po dice u komanda; mu ki ex koncili, mu habe diskusi ad alelo 16 tem dice: "Na fu akti qo a panto-ci homi? Veri, u ge-ski sema; qi pa gene acide per mu, pa gene monstra a panto-pe; qi du eko in civita Jerusalem, ko-co na ne posi dice u nega. 17 "Anti-co, te id gene difusi ne ma a panto-pe, na fu dice u menace; sti u dice de u-ci nima a nuli-pe." 18 Po dice veni, mu dice u komanda; mu ni dice ni dona sko de nima Jesu ali-kron. 19 Tem reakti, Petro e Joane dice: "Akti u judika; qe audi vi vice audi Teo es justi ante Teo. 20 "Na ne fu pote ne dice ra; na pa vide e pa audi." 21 Po dice ma menace, mu lase libe tem detekti nuli-ra; per qi mu fu akti puni kausa panto-pe, ka panto mu dona glori a Teo de ra; qi pa gene acide. 22 Un homi; epi qi u-ci repara sema pa gene acide, habe ma de tetra-ze anua.

23 Po gene libe, mu ki ad auto homi e dice a mu panto; plu cefa-hiera e plu arki-pe pa dice. 24 Po audi, mu kon akorda sti voka a Teo e dice: "Na Cefa: Tu es Teo; Qi pa face plu urani e u geo e u mari e panto-ra; qi es in mu, 25 "e Qi pa dice per stoma de Tu dulo David: '+Qo-ka plu demo akti ko koleri e panto-pe face skema ko no-funktio? 26 "'+Plu regi de geo sta, ko-co plu arki-pe kolekti se anti na Cefa e anti An Kristo.+' [Kanta 2:1,2] 27 "Veri, Herode e Pontio Pilato ko plu hetero demo e plu Israel-pe pa es ge-kolekti anti Tu sankti Dulo Jesu; epi Qi Tu pa fusi olea, 28 "te akti panto-ra; de qi Tu manu e Tu konsili pa face u pre-decide te fu gene acide. 29 "Na Cefa: nu sti vide a plu menace e sti dona a plu dulo de Tu u dice de Tu ko panto no-fobo; 30 "per qi Tu tensio manu te akti repara e te plu sema e plu mira gene acide kausa u nima de Tu sankti servi-Pe Jesu." 31 Po dice preka, u loka; in qi mu kolekti se, gene seiso, ko-co panto mu gene ple per Sankti-Spiritu e akti Teo dice ko no-fobo.

32 U kredi poli-pe es mo de kardia e de psiko, ko-co nuli-pe dice de habe-ra; id es de se, anti-co panto-ra es komuni. 33 Ko mega dina, plu Apostola dona u testi de ana-sta de na Cefa Jesu, ko-co mega filo es epi panto-pe. 34 Ali-pe inter mu habe zero minus, ka, tem akti vendo, panto habe-pe de plu landa alo de plu domi moti la plu valu de plu ge-vendo ra 35 e moti mu para plu pedi de plu Apostola. Difusi gene face a singu-pe akorda nece; u-ci pe habe. 36 Josef; qi pa gene ex plu Apostola un adi nima Barnaba; qi per translati es "An-fili de konsola", u Levi-fili e u Kipro-pe per nati, 37 po habe landa e po akti vendo, moti la u valuta e moti id para plu pedi de plu Apostola.

5

1 Uno andro, ko nima Anania, ko sponsa Safira, pa akti u vendo de habe-ra 2 e tena ab valu, tem u gina de an habe ski e, po fero u mero, moti id para pedi de plu Apostola. 3 Petro dice: "Anania: qo-ka Satan pa face ple tu kardia te dice u falsi a Sankti-Spiritu e te tena ab valu de landa? 4 "Qe id ne pa es de tu, tem id es? Po vendo, qe id ne es in tu arki? Qe tu pa face in tu kardia u skema de u-ci ra? Tu pa dice u falsi ne a plu homi sed a Teo." 5 Po Anania pa audi u dice, an kade e lose bio. U-ci sti mega fobo in panto; qi pa audi panto-ci. 6 Po sta, plu juve andro akti involve de an e, po fero, moti an ad-in tera. 7 Acide: po cirka tri horo, u gina ki in tem ne habe ski de ra; qi pa acide. 8 Petro reakti: "Sti dice; qe vi pa akti vendo de landa per u-ci?" Fe dice: "Ja, per u-ci." 9 Petro dice a fe: "Qo-ka vi pa dice un akorda te stimula Spiritu de na Cefa? Sti vide; plu pedi de plu homi; qi pa moti tu andro ad-in tera, es para porta e fu moti ex tu." 10 Fe imedia kade para pedi e lose bio. Po ki in, plu juve andro pa detekti morta fe. Po fero-ex, mu moti fe ad-in tera ko sponsa. 11 U-ci sti mega fobo in holo grega e in panto; qi pa audi panto-ci.

12 Plu sema e mira gene acide per manu de plu Apostola inter poli homi. Panto mu ko mo akorda es in portika Solomon. 13 Zero hetero pe akti risko de unio, anti-co panto-pe face importa mu. 14 Tali ma kredi-pe gene adi a na Cefa--poli-pe de andro e de gina, 15 so mu moti pato-pe a via e moti mu epi kli e kumbe-mo, so, tem veni, un umbra de Petro fu es u tegu epi uno-pe. 16 U mega de homi ex plu civita peri civita Jerusalem veni tem fero plu pato-pe e plu; qi es ge-turba per no-puri spiritu, e gene repara.

17 Po sta, u cefa arki-hiera e panto-pe kon an; qi es de Sadukai mero, gene ple per koleri 18 e moti manu epi plu Apostola e moti mu ad-in publika karcera. 19 Tem noktu, un angeli de na Cefa aperi plu karcera porta e, po lase ex, dice: 20 "Sti ki e, tem sta, dice panto dice de u-ci bio a panto-pe in Religio-do." 21 Po audi, mu ki a religio-do kron aurora e dona sko. Po u cefa arki-hiera ko plu-la homi veni, mu sti veni a koncili e a panto arki-pe de Israel-fili e bali [plu polica-pe] a karcera te moti ci mu. 22 Po veni, plu polica-pe ne detekti mu in karcera. Po versi, mu dona nova 23 tem dice: "Veri, na pa detekti ge-klude ko panto sekuri u karcera e detekti extra plu kura-pe tem sta ante porta. Po aperi, na detekti intra nuli-pe." 24 Po audi panto-ci verba, u cefa arki-hiera e u polica kapitana de Religio-do ko plu arki-hiera este enigma de mu--id es qo. 25 Po veni, uno-pe dona nova tem dice: "Sti vide; plu andro; vi pa moti ad-in karcera, es in Religio-do tem sta e dona sko a panto-pe." 26 Po ki ab, u polica kapitana ko plu polica-pe moti la mu--ne per viole, ka mu este fobo; panto-pe fu cide mu per lito. 27 Po moti la, mu face; mu sta in koncili. U cefa arki-hiera dona qestio 28 tem dice: "Qe na ne dice a vi u forti komanda; ne dona sko de u-ci nima? Sti vide; vi pa face ge-ple u civita Jerusalem per sko e tende moti epi na un hema de u-ci Homi." 29 Tem reakti, Petro ko plu Apostola dice: "Es nece: akti obe akorda Teo vice akorda plu homi. 30 "Teo de na patri pa leva Jesu; vi pa cide e pa pende epi dendro. 31 "Teo face importa An per dextro manu homo arki-Pe e salva-Pe te dona penite e apo de peka a demo Israel. 32 "Na es plu testi-pe de panto-ci dice. Homo es Sankti-Spiritu; Teo dona a plu obe-pe." 33 Po audi, mu este forti turba e cepti konsili te cide mu. 34 Po sta, u certa Farisai-pe in koncili ko nima Gamaliel, u lega doci-pe e ge-honora ex panto-pe, dice u komanda; sti extra plu Apostola brevi-tem 35 e dice a mu: "Israel-fili vi: sti kura a panto-ci andro pro ra; vi fu akti. 36 "Akorda-co Teuda pa gene origi tem dice; an es uno-pe. U numera de andro, cirka tetra-hekto, pa ki kon an. An pa gene morta. Panto-pe; qi pa akti obe, akti distribu de se e nu es nuli-ra. 37 "Po u-ci, u Galilaia-pe Juda pa gene origi tem plu di de lista e pa trakto poli homi seqe an. An lose bio. Panto-pe; qi pa este kredi de an, akti tele distribu de se. 38 "Mi nu dice a vi: apo se ab panto-ci homi e lase; mu du es. Akorda-co, si u konsili alo un ergo es ex plu homi, id fu es zero. 39 "Anti-co, si id es ex Teo, vi ne fu pote habe vikto, kaso vi fu es ge-detekti plu anti-Teo-pe." 40 Mu gene u kredi. Po sti veni de plu Apostola e po bati mu, mu dice u komanda; ne dice de u nima Jesu. Mu lase libe mu. 41 Ka-co mu ki ab koncili-lo tem dice un hedo; mu habe u valu; mu gene non-honora kausa u-ci nima. 42 Tem panto di in Religio-do e in plu domi, mu ne sto dona sko e voci boni nova de Jesu Kristo.

6

1 Tem plu-la di tem multi de sko-pe, u protesta ex plu Helena-pe anti plu Heber-pe gene acide, ka plu fe-vidua ne es ge-ski in panto-di servi. 2 Po sti veni, plu Mo-bi dice a poli-pe: "Linqi Teo dice te akti servi para tabla ne habe logika a na. 3 "Ka-co, kredi-pe vi: akti cerka de seti andro ex vi; de qi vi dice testi e qi es ple per Sankti-Spiritu e per sofi. Na fu elekti mu supra u-ci ra. 4 "Na fu dura per preka e per servi de dice." 5 U dice es gluko ante holo poli-pe. Mu elekti Stefano, andro ple per fide e per Sankti-Spiritu, e Filipo e Prokoro e Nikanor e Timon e Parmena e Nikola, gene-kredi-pe ex civita Antiokea; 6 Mu duce mu ante plu Apostola. Po dice preka, mu moti manu epi mu. 7 Teo dice gene kresce, ko-co u numera de sko-pe in civita Jerusalem mega gene multi, klu u poli-pe de hiera akti obe a fide.

8 Stefen, ple per fide e dina, akti plu mega mira e sema inter panto-pe. 9 Plu certa homi de Religio-do; ge-nima Libe-pe, sta ko Kirena-pe e Alexandra-pe ko Cilicia-pe e Asia-pe tem dice disputa ko Stefano. 10 Mu ne pote akti resista anti sofi e anti Spiritu; per qi an dice. 11 Po-co mu stimula ko kripto plu andro; qi dice: "Na pa audi; an akti plu falsi dice anti Moses e anti Teo." 12 Mu stimula panto-pe ko plu arki-pe e plu religio tekno-pe e, tem veni, mu rapi an e duce an a koncili. 13 Mu duce falsi testi-pe; qi dice: "U-ci homi ne sto akti falsi dice anti u-ci sankti loka e anti u-ci lega. 14 "Akorda-co na pa audi; an dice; Jesu ex civita Nazaret fu destru u-ci loka e fu muta plu ra; Moses pa dona a na." 15 Tem skope ad an, panto; qi sedi in koncili, vide; an facia es homo facia de angeli.

7

1 Un arki-hiera dice: "Qe plu-ci es so?" 2 An dice: "Relatio-pe e patri vi: sti audi! Teo de glori monstra Se a patri Abraam, tem an es in landa Mesopotamia, pre an du eko in landa Haran, 3 "e dice ad an: '+Ki ex tu landa e ex tu relatio-pe, ko-co ki ad-in landa; Mi fu monstra a tu.+' [Gene-nati 12:1] 4 "Po-co tem ki ex landa Kaldea, an du eko in landa Haran e, kron an patri lose bio, An apo an ad u-ci landa; in qi vi nu du eko. 5 "An ne pa dona u geneti-lo in id, klu ne pro mo pedi. An dice u promise; An fu dona id iso habe-ra ad an e a plu fili po an tem an habe zero infanti. 6 "Teo dice so: plu-ci fili fu es plu iti-pe in xeno landa, ko-co pe fu face dulo mu e fu mali-uti mu tem tetra-hekto anua. 7 "Teo dice: '+Mi fu akti judika a demo; pro qi mu fu es plu dulo. Po panto-ci, mu fu ki ex e dona servi a Mi in u-ci loka.+' [Gene-nati 15:14; Ki-ex 3:12] 8 "An dona u testi-ra de peri-seka, so an habe Isaak e akti peri-seka kron di okto. Isaak habe Jakob, e Jakob mo-bi patri-arki-pe. 9 "Panto-ci patri-arki-pe, tem este invidi anti Josef, vendo an a landa Egipto. Teo es kon an 10 "e akti an salva ex panto turba e dona favo e sofi ante Farao; an-regi de landa Egipto; qi face u krati-pe an supra holo domi. 11 "U famina ko mega turba veni epi holo landa Egipto e Kanaan. Na patri ne du detekti vora-ma. 12 "Po audi; es grana in Egipto, Jakob bali plu patri de na proto-kron. 13 "Kron-bi, Josef gene monstra a panto fratri. Josef famili es ge-ski a Farao. 14 "Po bali, Josef sti veni de patri Jakob e de panto relati-pe, seti-penta psiko. 15 "Jakob ki a landa Egipto e lose bio--an ko plu patri de na-- 16 "ko-co mu gene fero a landa Sihem e gene moti in tafo; Abraam pa merka per qantita de valuta ab plu fili de Emor ex Sihem. 17 "Tem u kron de promise; Teo pa dice homo jura ad Abraam, ki proxi, u-ci demo du kresce e du multi se in Egipto 18 "a-kron u regi; qi ne habe ski de Josef, gene origi. 19 "Po akti ko mali-tekno a na racia, an mali-akti anti na patri tem apo plu babi, so mu ne fu habe bio. 20 "Tem u-la, Moses gene nati; qi es kali a Teo e gene eduka in patri domi tem tri meno. 21 "Tem an gene apo, u fe-fili de Farao prende ana an pro auto an-fili. 22 "Moses gene sko de panto sofi de Egipto-pe e es dina per dice e per akti. 23 "Kron an habe tetra-ze anua, u kura de plu Israel-fili fratri gene surge in an psiko. 24 "Tem vide uno-pe de mu gene mali-akti, an akti alexi e akti versi-puni pro an; qi pa gene mali-akti e cide un Egipto-pe. 25 "An doxo; plu fratri gene u logi; Teo dona salva per an manu. Mu ne gene logi. 26 "Tem seqe di, an monstra se a plu fratri; qi habe lukta, e tenta stimula a paci tem dice: 'Fratri vi: qo-ka vi mali-akti anti alelo?' 27 "An; qi mali-akti anti proxi-pe, pulsa ab se tem dice: '+Qo-pe pa face tu u judika-pe de na?' 28 "'+Qe tu volu cide mi per mode; per qi tu pa cide un Egipto-pe pa-di?+' [Ki-ex 2:14] 29 "Po u-ci dice, Moses akti fugi e es u xeno-pe in landa Midian, topo an gene bi an-fili. 30 "Po tetra-ze anua, un Angeli de na Cefa monstra se in deserta per flama de piro de pusi dendro. 31 "Tem vide, Moses gene mira de vista. Tem ki-proxi te skope, es u voka de na Cefa ad an: 32 "'+Mi es u Teo de tu patri--u Teo de Abraam e u Teo de Isaak e u Teo de Jakob.+' Po gene tremulo, Moses ne debi skope. [Ki-ex 3:6,15] 33 "Na Cefa dice: '+Apo plu pedi-ve ab tu pedi, ka u loka; epi qi tu sta, es u sankti tera. 34 "'+Tem vide, Mi pa vide u mali-akti anti Mi demo in Egipto e pa audi algo-soni. Mi pa ki kata te apo mu. Nu sti veni, ko-co Mi fu bali tu a land Egipto.+' [Ki-ex 3:5,7,8,10] 35 "Teo bali u-ci Moses; mu pa nega tem dice: '+Qo-pe face tu un krati-pe e u judika-pe?+' iso un krati-pe e u judike-pe per manu de Angeli; Qi monstra Se in pusi dendro. [Ki-ex 2:14] 36 "U-ci duce mu po akti plu mira e sema in landa Egipto e in mari Rubi e in deserta tem tetra-ze anua. 37 "U-ci es Moses; qi dice ad Israel-fili: '+Na Cefa, tu Teo, fu face u Profeta ex vi fratri homo mi. Vi fu audi An.+' [Nomi-bi 18:15] 38 "U-ci es an; qi du es in grega in deserta kon Angeli; Qi du dice epi monti Sinai, e qi du es ko na patri; qi du gene plu vive dice te dona a na, 39 "e infra qi na patri ne volu es sed bali ex e tropo se versi landa Egipto 40 "tem dice ad Aaron: '+Face a na plu teo; qi fu ki ante na, ka u-la Moses; qi duce na ex landa Egipto--na ne habe u ski; qo pa acide.+' [Ki-ex 32:1,23] 41 "Mu face u babi bovi tem plu-la di e akti sakrifice ad idoli e este hedo kausa ergo de manu. 42 "Teo tropo Se e lase; mu akti servi a [falsi] grega de urani akorda ge-grafo in bibli de plu profeta: '+Demo Israel vi: qe vi pa dona a Mi plu ge-cide zoa e sakrifice tem tetra-ze anua in deserta? 43 "'+Vi pa cepti u te-do de Moloh e un astro de vi teo Remfan--plu modela; vi pa face te dona a mu latri. Mi fu apo vi ultra civita Babilono.+' [Amos 5:25-27] 44 "U te-do de testi du es inter na patri in deserta akorda komanda; An pa dice a Moses: sti face akorda modela; an pa vide. 45 "Plu patri de na moti id a ci ko Josua po gene un habe de plu hetero demo; Teo bali ab facia de na patri a plu di de David; 46 "qi detekti favo ante Teo e dice u petitio; face u religio-do pro Teo. 47 "Solomon tekto An domi." 48 "Anti-co u maxi-alti-Pe ne habe eko in religio-do; ge-face per manu, akorda profeta dice: 49 "'+Un urani es a Mi u regi-mo e u geo pedi-mo a pedi. Vi fu tekto qo domi a Mi'--na Cefa dice--'alo qo loka de relaxa? 50 "'+Ne Mi manu pa krea panto-ci?+' [Isaia 66:1,2] 51 "Obstina e ne ge-peri-seka de kardia e de oti vi: homo plu patri, plus vi akti resista anti Sankti-Spiritu panto-tem. 52 "Plu patri de vi ne pa akti opresi anti qo profeta? Mu pa cide panto; qi pa pre-voci u veni de u justi-Pe; de Qi vi nu es plu vendo-pe e plu cide-pe. 53 "Vi pa gene u lega per monstra ex plu angeli e ne tena obe."

54 Kron audi panto-ci, mu gene fo koleri e fo frika denti anti an. 55 Tem es ple per Sankti-Spiritu e po skope ad urani, an vide u glori de Teo e vide Jesu; Qi sta para Teo dextro. 56 An dice: "Vide; mi vide plu ge-aperi urani e un homi-Fili; Qi sta para Teo dextro." 57 Tem fo voci per fo soni voka, mu tena plu oti e dromo anti An kon unio. 58 Po bali an ex civita, mu jeti plu lito. Plu testi-pe moti plu vesti para pedi de u juve andro; ge-nima Saul. 59 Mu jeti plu lito anti Stefano, tem an voci tem dice: "Cefa Jesu: cepti mi spiritu." 60 Po kade epi genu, an voci per fo soni voka: "Cefa: ne puta a mu u-ci peka." Po dice u-ci, an gene somni.

8

1 Saul dice akorda ad an cide. Acide kron u-la di: es u mega opresi anti grega in civita Jerusalem. Panto-pe excepti plu apostola gene difusi dia plu landa Juda e Samaria. 2 Plu religio andro moti Stefano ad-in tera e face mega tristi de an. 3 Saul face viole anti na grega tem ki ad-in panto domi e trakto plu andro e plu gina ad-in karcera.

4 Mu; qi pa gene difusi, ki dia landa tem voci plu boni dice. 5 Tem ki ad-in civita de Samaria, Filipo voci Kristo. 6 U poli-pe pa dona kura kon akorda a ra; Filipo dice, tem audi e vide plu sema; an akti. 7 Poli homi; qi habe plu no-puri spiritu; qi ki ex ko fo soni voka. Po es paralisi e klaudi, poli-pe gene repara. 8 Mega hedo gene acide in u-la civita. 9 U certa andro ko nima Simon pa es in civita tem uti magika e face stupe u landa Samaria tem dice; an auto es un importa-pe. 10 Panto-pe, pusi a mega, dona kura ad an tem dice: "U-ci es u mega dina de Teo." 11 Mu dona kura, ka an pa face stupe mu per magika longi-tem. 12 Kron mu gene kredi; Filipo voci de plu boni nova de Teo regi-landa e de nima Jesu Kristo, mu, andro e gina, gene bapti-ritu. 13 Simon gene kredi. Po gene bapti-ritu, an du es ko Filipo. Tem skope plu mega sema e ergo; an akti, an este mira. 14 Po audi; landa Samaria pa cepti Teo dice, plu apostola in civita Jerusalem bali Petro e Joane. 15 Po veni, mu dice preka pro mu, te mu fu gene Sankti-Spiritu. 16 Ka An pa kade epi nuli-pe a-nu. Mu pa gene bapti-ritu solo ad-in nima Cefa Jesu. 17 Kron mu moti manu epi mu. Mu gene Sankti-Spiritu. 18 Po vide; Sankti-Spiritu gene dona per moti epi mu plu manu de Apostola, Simon dona un ofere de pluto 19 tem dice: "Sti dona a mi u-ci dina, so, po moti mi manu epi ali-pe, pe fu gene Sankti-Spiritu." 20 Petro dice ad an: "Tu valuta fu gene destru ko tu, ka tu pa doxo; pe gene u doro de Teo per pluto. 21 "Es a tu ni mero ni fortuna in u-ci ra, ka tu psiko ne es justi ante Teo. 22 "Ka-co sti penite de u-ci kako e sti petitio a Teo, si u doxo de tu psiko posi gene pardo a tu. 23 "Mi vide; tu es in turba de mali emotio e in liga de no-justi." 24 Tem reakti, Simon dice: "Sti petitio pro mi a na Cefa, so zero; de qi vi pa dice, fu veni anti mi." 25 Ka-co, po dice testi e dice na Cefa dice, mu ki versi civita Jerusalem e voci plu boni nova a poli Samaria viki.

26 Un angeli de na Cefa dice a Filipo: "Sti sta e sti ki a sud epi via; qi duce ab civita Jerusalem a civita Gaza. Id es deserta." 27 Po sti sta, an sti ki. Vide; un Etiopia ofici-an; qi es infra Etiopia regi-fe Kandace e es supra holo tresora e qi pa veni te akti latri in civita Jerusalem 28 e qi ki versi e qi sedi in vagona, lekto u profeta Isaia. 29 Spiritu dice a Filipo: "Sti proxi e gene inkontra kon u-ci vagona." 30 Tem dromo, Filipo audi lekto ex profeta Isaia e dice: "Qe tu habe ski de ra; tu lekto?" 31 An dice: "Mi fu sio pote per qo-mode, si pe ne duce mi?" An dice a Filipo u petitio; po ki ana, sti sedi kon an. 32 U loka de Grafo; an lekto, es: "+An gene duce homo ovis [gene duce] a cide, ko-co homo un ovis-fili es no-soni anti pe; qi uti cisori, so An ne aperi stoma. 33 "+Per humili, u justi judika gene apo. Qo-pe fu habe ski de plu fili de An? Ka An bio gene apo ab geo.+" [Isaia 53:7-8] 34 Tem reakti, un ofici-pe dice a Filipo: "Mi dice a tu u qestio; u profeta dice u-ci de qo-pe: de se alo de u certa hetero pe?" 35 Po aperi stoma e po face proto ab u-ci grafo, Filipo voci u boni nova de Jesu. 36 Tem viagia longi via, mu gene inkontra kon u certa aqa. Un ofici-pe dice: "Sti vide aqa. Qo sto mi gene bapti-ritu?" 37 Filipo dice: "Si tu habe kredi ex holo psiko, lice." Tem reakti, an dice: "Mi habe u kredi; Jesu Kristo es un an-Fili de Teo." 38 An dice u komanda; u vagona gene sta. Ambi Filipo e un ofici-pe ki ad-in aqa. An akti bapti-ritu. 39 Kron ki ex aqa, Spiritu de na Cefa kapti Filipo. Un ofici-pe ne du vide an, ka an ki longi via tem voci hedo. 40 Filipo gene detekti in landa Azoto. Tem ki dia, an voci plu boni nova in panto civita a-kron veni a civita Cesarea.

9

1 A-nu, Saul dice menace de cide anti plu sko-pe de na Cefa. Po veni a cefa arki-hiera, 2 An dice u petitio; an gene plu grama ex an te ki ad-in civita Damasko a plu religio-do, so, si ali-pe, andro alo gina, gene detekti es de u-ci mode, po liga mu, an fu duce mu ad-in civita Jerusalem. 3 Tem viagia, acide: an ki proxi civita Damasko. Subito, u foto ex urani es peri an. 4 Po kade epi landa, an audi u voci dice: "Saul, Saul: qo-te tu akti opresi anti Mi?" 5 An dice: "Qo-pe es tu, mi Cefa?" Na Cefa dice: "Mi es Jesu; anti Qi tu akti opresi. Tu pedi anti plu punge es no-facili." 6 Tem tremulo e este subito, an dice: "Cefa: Tu volu mi akti qo?" Na Cefa dice ad an: "Sti sta e sti ki a civita, ko-co u ra; tu nece akti, fu gene dice a tu." 7 Plu andro; qi ki tem viagia, sta minus dice tem audi u voka sed vide nuli-pe. 8 Saul sti sta ab landa e, po aperi oku, an vide nuli-pe. Tem duce per manu, mu duce an a civita Damasko. 9 Tem tri di, an ne pote vide e ni vora ni bibe. 10 Es uno sko-pe ko nima Anania in civita Damasko. Na Cefa dice ad an per idio vista: "Anania." An dice: "Cefa: vide; es mi." 11 Na Cefa dice ad an: "Po surge, sti ki epi strata ko nima Rekti e sti cerka de homi ko nima Saul de civita Tarso in Juda domi. Vide; an dice preka. 12 "An pa vide per idio vista un homi ko nima Anania; qi veni e moti manu epi an, te an gene vide-pote." 13 Anania reakti: "Cefa: mi pa audi ex poli homi de u-ci andro--de poli kako; an pa akti anti plu sankti homi in civita Jerusalem. 14 "Ci an habe arki ex plu arki-hiera te liga panto-pe; qi dice Tu nima." 15 Na Cefa dice ad an: "Sti ki, ka u-ci es a Mi u ge-elekti vasa te fero Mi nima a no-juda-pe e a regi e ad Israel-fili. 16 "Mi fu monstra u qantita de sufero; an nece gene kausa Mi nima." 17 Anania ki-ab e ki a domi e, po moti manu epi an, an dice: "Fratri Saul, na Cefa Jesu; Qi pa monstra Se a tu in via; in qi tu pa veni, pa bali mi, te tu fu gene vide-pote e gene ple per Sankti-Spiritu." 18 Imedia, uno-ra; qi feno es plu lepido, kade ab oku, ko-co an subito gene vide-pote e, po surge, gene bapti-ritu. 19 Po gene fago, an gene forti. Acide: Saul es ko sko-pe in Damasko tem uno qantita de plu di. 20 Subito, an es in Juda religio-do tem dona sko de Kristo; An es u Fili de Teo. 21 Panto-pe; qi audi, este mira e dice: "Qe ne u-ci es pe; qi pa destru in civita Jerusalem pe; qi voci u-ci nima, e pa veni a ci, te, po liga mu, an fu duce mu a plu arki-hiera?" 22 Saul gene ma dina e dona turba a plu Juda-pe; qi du eko in civita Damasko, tem dona verifi; u-la es Kristo. 23 Po poli di gene fini, plu Juda-pe dice konsili ad alelo te cide an. 24 U skema gene ge-ski a Saul. Mu skope panto janu tem di e noktu te cide an. 25 Po duce an tem noktu, mu lase kata an in korbe dia mura. 26 Po veni a civita Jerusalem, an tenta gene unio ko plu sko-pe. Panto mu este fobo de an tem ne este kredi; an es u sko-pe. 27 Po duce an, Barnaba duce an a plu apostola e dice u mode; per qi an pa vide na Cefa e per qi An dice e per qi an dona sko de u nima de Jesu in civita Damasko. 28 An es ko mu tem ki in e ki ex in civita Jerusalem e tem dona sko de u nima de na Cefa Jesu. 29 An dice e habe disputa ko plu Helena-pe. Mu gene prepara te cide an. 30 Po gene ski, plu Kristo-pe duce an a civita Cesarea e bali an a civita Tarso. 31 Veri, plu eklesia in holo Juda e Galilai landa habe paci tem gene forti e dura per fobo de na Cefa, e, per konsola de Sankti-Spiritu, gene ma membra.

32 Acide: tem ki dia panto [civita], Petro ki a plu sankti-pe; qi du eko in civita Lida. 33 An detekti la un andro ko nima Ainea; qi pa kumbe epi kli tem okto anua e qi habe paralisi. 34 Petro dice: "Ainea: Jesu Kristo sti repara tu." An imedia sti sta. 35 Panto-pe; qi du eko in civita Lida e in landa Sarona, vide an e tropi se a na Cefa.

36 In civita Jopa es u sko-pe ko nima Tabita; qi translati es Cervus. Fe pa es ple ko plu boni ergo e plu doro; qi fe akti. 37 Acide tem plu-la di: po gene pato, fe gene morta. Po lava fe, mu lase fe in supra. 38 Ka civita Lida es proxi civita Jopa, plu sko-pe pa audi; Petro es in id, e bali bi andro ad an te dice petitio; an ne resta sed veni a mu. 39 Po sti sta, Petro ki ko mu. Po veni, mu duce an ad-in supra, ko-co panto fe-vidua sta tem plora e monstra plu tunika e vesti; Cervus pa face tem es ko mu. 40 Po bali ex panto-pe, Petro dice u preka po es epi genu. Po tropi a morta soma, an dice: "Tabita: sti sta." Po aperi oku e vide Petro, fe sedi. 41 Po dona manu, an face ge-sta fe e, po sti veni de plu sankti-pe e plu fe-vidua, an dona vive fe. 42 U-ci gene ge-ski in holo landa Jopa, ko-co poli homi habe kredi de na Cefa. 43 Acide: an du resta poli di in civita Jopa ko derma-pe Simon.

10

1 In civita Cesarea es un homi ko nima Kornelio, un hekto-kapitana de milita grega ko nima Italia 2 e u religio homi tem este fobo de Teo ko panto-pe in eko-lo e tem dona plu doro a poli homi e dice preka panto-tem. 3 An vide in idio vista ko klari kron u horo nona de di un angeli de Teo; qi veni ad an e dice: "Kornelio!" 4 Po vide an e gene fobo, an dice: "Sinior: es qo?" An dice: "Tu preka e tu doro pa ki ana homo memo ante Teo. 5 "Nu, sti bali plu andro a civita Jopa e sti veni de Simon; qi habe un adi nima Petro. 6 "An du eko kon uno derma-pe Simon; qi du eko para mari. An fu dice a tu ra; qi nece gene ge-face a tu." 7 Po un angeli; qi pa dice a Kornelio, pa ki ab e po sti u veni de bi servi-pe e de mo religio soldata de plu homi; qi du servi, 8 e po sti ge-ski panto-ra, an bali mu a civita Jopa. 9 Tem fu-di tem viagia e tem plu-la homi gene proxi a civita Jopa, Petro ki epi stego te dice preka cirka horo sixa. 10 An gene fo fami e volu vora. Tem mu kuko id, u trance gene acide. 11 An vide; un urani gene aperi, ko-co u vasa homo mega lamina-te; ge-liga topo tetra gono e ge-kata epi geo, ki-kata. 12 In id es panto tetra-poda e agrio zoa de geo ko panto repti-ra e avi de urani. 13 U voka veni ad an: "Petro: po sti sta, sti cide e sti vora!" 14 Petro dice: "Per zero mode, mi Cefa, ka mi pa vora zero vulga alo no-puri ra!" 15 Itera kron bi, u voka veni ad an: "Ne face no-puri ra; Teo pa face puri. 16 U-ci gene acide tri kron, ko-co u vasa itera gene prende ad urani. 17 Tem Petro este in se un enigma; un idio vista es qo, vide; panto andro; qi gene ge-bali ab Kornelio e qi pa dice qestio de un eko-lo de Simon, sta epi portika. 18 Po voci, mu dice qestio; qe Simon; qi habe adi nima Petro, du eko ci. 19 Tem Petro du kogita de idio vista, [Teo] Spiritu dice: "Sti vide; tri andro tenta detekti tu. 20 "Anti-co, po sti sta, sti ki kata e sti ki ko mu tem este dubi de zero ra, ka Mi pa bali mu." 21 Po ki kata, Petro dice a panto andro; qi gene bali ex Kornelio ad an: "Sti vide; mi es pe; qi vi tenta detekti. Vi pa veni kausa qo?" 22 Mu dice: "Kornelio--un hekto-kapitana e u religio homi; qi habe fobo de Teo e qi habe testi ex holo Juda natio--gene ex sankti angeli u demando; bali na a tu eko-lo e audi dice ex tu." 23 Po sti veni, an dona eko. Tem fu-di, Petro sti ki ko mu, ko-co plu Kristo-pe ex Jopa ki ko. 24 Tem fu-di, mu ki ad-in civita Cesarea. Kornelio du atende po sti veni plu relati-pe e ge-ski ami. 25 Tem Petro ki in e po gene unio e po kade epi an pedi, Kornelio dona latri. 26 Petro leva an tem dice: "Sti sta! Plus mi es un andro." 27 Tem konversa, an ki in e detekti ge-grega poli homi. 28 An dice a mu: "Vi habe u ski; es fo no-lega: u Juda-pe face unio ko alo ki proxi xeno-pe. Teo pa monstra a mi; dona verba 'vulga' alo 'no-puri' a nuli-pe. 29 "Ka-co, minus dice adi, mi pa veni po gene bali. Ka-co mi dice qestio; vi pa bali mi kausa qo?" 30 Kornelio dice: "Pre tetra di ad u-ci horo, mi sto vora e, tem horo nona, mi dice preka in mi eko-lo. Vide; un andro in foto vesti sta ante mi. 31 An dice: 'Kornelio, tu preka gene audi e tu doro gene memo ante Teo. 32 "'Sti bali a civita Jopa, ko-co sti veni de Simon kon adi nima Petro. An du eko in eko-lo de Simon; u derma-pe para mari. Po veni, an fu dice a tu.' 33 "Ka-co mi imedia bali a tu. Tu boni akti u-ci; tu pa veni. Ka-co panto na nu es ci ante Teo te audi panto-ra; qi pa gene komanda ex Teo a tu." 34 Tem aperi stoma, Petro dice: "Veri, mi gene logi; Teo ne es un honora-pe de homi. 35 "Anti-co, in panto natio, pe; qi habe fobo e akti justa, es ge-cepti. 36 "Tu habe ski de panto verba; An bali a panto Israel-fili e qi sti ge-ski u paci per Jesu Kristo--u-ci es u Cefa de panto-ra-- 37 "e de dice; qi veni dia holo landa Juda; proto ex landa Galilaia ko bapti-ritu; Johane pa sti ge-ski, 38 "e de Jesu ex civita Nazaret e de mode; per qi Teo pa fusi Sankti-Spiritu e dina epi An; Qi ki tem akti boni e sti repara panto-pe; qi habe opresi ex diabola, ka Teo es kon An. 39 "Na es plu testi-pe de panto-ra; An akti in landa de Juda-pe e in civita Jerusalem. Mu cide An po pende An epi dendro. 40 Teo pa leva An kron di tri e dona An te es u monstra 41 "ne a panto-pe sed a plu testi-pe; qi pa gene pre-elekti ex Teo--a na; qi pa vora e pa bibe kon An, po An gene leva ex morta-pe. 42 "An dice a na u komanda; sti ge-ski e dice testi a panto-pe; es An; Qi pa gene elekti ex Teo u judika-pe de vive-pe e morta-pe. 43 "Panto profeta dice testi de An; panto-pe; qi habe kredi de An, fu gene apo de peka per An nima." 44 Klu tem Petro dice panto-ci verba, Sankti-Spiritu acide epi panto-pe; qi audi [Teo] verba. 45 Panto peri-seka kredi-pe; qi pa veni ko Petro, este mira, kron u doro de Sankti-Spiritu acide in plu hetero demo. 46 Ka mu audi; mu dice [xeno] lingua e face importa Teo. Po-co Petro reakti: 47 "Qe es posi; uno-pe ne lice aqa te dona bapti-ritu a panto-ci; homo na, Sankti-Spiritu pa cepti?" 48 An dice komanda; mu gene bapti-ritu per u nima de na Cefa. Po-co mu dice petitio; an fu resta tem uno qantita de plu di.

11

1 Plu apostola e Kristo-pe; qi es in landa Juda, audi; plu hetero demo pa gene Teo verba. 2 Po-co Petro ki a civita Jerusalem, plu peri-seka-pe dona disputa ad an 3 tem dice: "Tu pa ki a plu no-peri-seka andro e pa vora!" 4 Po proto, Petro klari dona id per sistema tem dice: 5 "Mi pa es in civita Jopa tem preka, ko-co mi vide in trance un idio vista; u vasa; homo mega lamina-te ki kata, gene kata per tetra gono ex urani e veni a mi. 6 "Po in-skope, mi puta e vide plu tetra-poda-ra e agrio zoa e repti-ra e avi de urani. 7 "Mi audi u voka; qi dice a mi: 'Po sti sta, Petro: sti cide e sti vora. 8 "Mi dice: 'Per zero mode, mi Cefa, ka zero vulga alo no-puri ra pa ki ad-in stoma!' 9 "U voka reakti kron bi ex urani: 'Ne face vulga ra; Teo pa face puri.' 10 "U-ci pa gene acide tri kron, ko-co panto-ra gene trakto ad urani. 11 "Vide; tri andro; ge-bali ex civita Cesarea a mi, subito sta proxi eko-lo; in qi mi es. 12 "[Teo] Spiritu dice a mi; ki ko mu tem este zero dubi. Sixa Kristo-pe ki ko mi, ko-co na ki ad-in eko-lo de u-ci andro. 13 "An sti ge-ski a na u mode; per qi an pa vide in eko-lo un angeli; qi sta e dice: 'Sti bali a civita Jopa plu andro, ko-co sti veni de Simon; qi habe un adi-nima Petro. 14 "'An fu dice plu verba; per qi tu ko panto-pe in tu eko-lo fu gene salva.' 15 "Tem mi proto dice, Sankti-Spiritu gene acide a mu homo a na tem proto. 16 "Mi pa sti memo de Teo dice; kron An dice: '+Johane akti bapti-ritu per aqa, anti-co vi fu gene bapti-ritu per Sankti-Spiritu.+' [Matai 3:11; Marko 1:8; Luka 3:16] 17 "Ka-co, si Teo pa dona a mu homo a na un iso doro po habe kredi de na Cefa Jesu Kristo, qo-pe es mi; qi posi veto Teo?" 18 Po audi panto-ci, mu es silento e dona glori a Teo tem dice: "Veri, Teo dona a plu hetero natio u penite de vive."

19 Ka-co, veri, mu; qi pa gene difusi kausa opresi; qi gene acide po Stefano, ki a plu landa Foinicia e Cipro e a civita Antiokea tem dice Teo verba a nuli-pe solo excepti a plu Juda-pe. 20 Es plu homi ex mu, Cipro-pe e Kirena-pe; qi, po veni a civita Antiokea, dice a plu Helena-pe tem face ge-ski na Cefa Jesu. 21 U manu de na Cefa es ko mu. Po gene kredi, u mega qantita tropi se a na Cefa. 22 U nova de mu gene audi ad-in oti de eklesia; qi es in civita Jerusalem. Mu bali Barnaba te ki a civita Antiokea. 23 Po veni e po vide u filo de Teo, an voci hedo e dice a panto-pe te, ko mo kausa, tena fide de na Cefa. 24 Ka an es u boni andro e es ple ko Sankti-Spiritu e ko fide. U mega poli-pe gene adi a na Cefa. 25 Barnaba ki a civita Tarso te tenta detekti Saul. 26 Po detekti an, an duce an a civita Antiokea. Acide: mu es in u-la eklesia tem holo anua, ko-co mu dona sko a mega poli-pe, ko-co plu sko-pe proto gene u nima "Kristo-pe" in civita Antiokea. 27 Tem plu-la di, plu profeta ki ex civita Jerusalem a civita Antiokea. 28 Po mo ko nima Agabo sti sta ex mu, an dice per [Teo] Spiritu; u mega famina nu-fu es epi holo landa. U-ci gene acide tem Klaudio Cesari. 29 Akorda ra; pe pa habe, panto sko-pe face decide; bali servi a plu Kristo-pe; qi du eko in civita Jerusalem. 30 Mu akti u-ci tem bali a plu eklesia krati-pe per manu de Barnaba e Saul.

12

1 U-la tem, regi Herode akti te kako uti plu homi ex eklesia. 2 An pa cide Jakob; fratri de Joane, per gladia. 3 Po vide; u-ci dona hedo a plu Juda-pe, an plus akti te kapti Petro. Es plu di de no-zima pani. 4 Po kapti an, an duce an ad-in karcera po dona an a tetra guarda grega te tena an, tem tende duce an a panto-pe po Paska. 5 Ka-co, veri, Petro gene tena in karcera. U preka de an pa gene ge-face forti ex eklesia a Teo. 6 Tem Herode tende duce an e tem u-ci noktu, Petro; ge-liga per bi katena, du somni inter bi soldata, ko-co bi guarda ante porta akti kura de karcera. 7 Vide; un angeli de na Cefa sta, ko-co u foto es in domi. Po bate u latu de Petro, an face vigi an tem dice: "Sti sta per tako!" Plu katena kade ab manu. 8 Un angeli dice ad an: "Sti moti u zona epi se, ko-co fixa plu pedi-ve." An so akti. An dice: "Sti moti vesti, ko-co sti ki seqe mi." 9 Tem ki avanti, An ki seqe. An ne este ski; ra; qi gene acide per angeli, es reali, anti-co an puta; an sio vide un idio vista. 10 Po ki dia u mo e dia u guarda grega bi, mu veni a feru porta; qi duce ad-in civita e qi aperi se. Po ki ex, mu dura longi mo strata, ko-co un angeli imedia ki ab an. 11 Po re-gene este, Petro dice: "Mi nu veri ski; mi Cefa pa bali un angeli e pa salva mi ex manu de Herode e ex panto expekta de plu Juda homi." 12 Tem puta, an veni a domi de Maria; u matri de Joane; qi habe un adi nima Marko, topo poli homi pa gene veni e nu dice preka. 13 Po bate u porta de portika, u ju-fe ko nima Roda veni a portika te audi. 14 Po gene rekogni de voka de Petro, fe ne aperi u portika kausa hedo e, po dromo in, dice u nova; Petro du sta ante u portika. 15 Mu dice a fe: "Tu es rabi!" Anti-co fe forti dice; es so. Mu dice: "Es an angeli." 16 Petro dura bate. Po aperi, mu vide e gene mira. 17 Po face per manu u sema de silento, an sti ski per mode; per qi na Cefa pa duce an ex karcera. An dice: "Dice panto-ci a Jakob e a plu Kristo-pe." Po ki ex, an ki ad hetero loka. 18 Po di veni, es inter plu soldata zero pusi turba; qo pa gene acide a Petro. 19 Po tenta detekti e po ne detekti an e po dice examina a plu guarda, Herode dice komanda; mu gene cide. Po ki ab landa Juda a civita Cesarea, an resta.

20 Herode este fo non-ami anti plu Tiro-pe e Sidono-pe. Anti-co mu veni ad an kon akorda e, po sti un ami Blasto; qi habe arki supra somni-ka de regi, mu tenta paci. 21 Tem pre ge-elekti di e po moti plu regi vesti epi se e po sedi epi regi-lo, Herode dice oratora a mu. 22 U demo du voci: "U voka de Teo e ne de homi!" 23 Un angeli de na Cefa imedia bate an, ka an ne pa dona glori a Teo. Po gene ge-vora per plu vermi, an lose bio. 24 Plu dice de Teo gene kresce e multi. 25 Barnaba e Saul ki-versi ex civita Jerusalem po akti servi e po ki ko Joane; qi pa gene un adi-nima Marko.

13

1 Es in eklesia; qi es in civita Antiokea, plu certa profeta e doci-pe: Barnaba e Simeon; ge-nima Niger, e Kirena-pe Lukio e Manaen; qi pa gene eduka ko arki-tetra-pe Herode, e Saul. 2 Tem mu akti servi e sto vora a na Cefa, Sankti-Spiritu dice: "Sti separa de Barnaba e Saul pro ergo; a qi Mi pa sti mu veni." 3 Po sto vora e po dice preka tem tri di e po moti manu epi mu, mu bali mu. 4 Po gene bali veri ex Sankti-Spiritu, mu ki a civita Seleucia; ab qi mu sti veli ad insula Cipro. 5 Po ki a civita Salami, mu voci nova de Teo verba in plu Juda-pe religio-do. Mu habe un auxi-pe Joane. 6 Po ki trans insula a civita Pafo, mu detekti u certa magika-pe; Juda falsi profeta, qi nima es Barjesu. 7 An es kon arki-pe Sergio Paulo; un intelige andro. Po sti veni de Barnaba e Saul, an volu audi Teo dice. 8 U Magika-pe Elima, u nima gene so translati, tenta tropi un arki-pe ab fide. 9 Tem ple per Sankti-Spiritu e po skope ad an, Saul; qi es Paulo, 10 dice: "Tu; ge-ple per panto kako e panto mali tekno e fili de diabola e anti-pe de panto justi: qe tu ne sto tropi ab rekti mode de na Cefa? 11 "Nu sti vide; Teo manu es epi tu, ko-co tu fu es no-vide tem ne vide un heli." Nebu e skoto imedia gene acide epi an, ko-co an tenta detekti duce per manu. 12 Po vide ra; qi pa gene acide, un arki-pe gene kredi tem este mira kausa doci de na Cefa.

13 Po sti veli ab civita Pafo ko grega, Paulo ki a civita Perga in landa Pamfilia. Po ki ab, Joane ki versi civita Jerusalem. 14 Po ki ab civita Perga, mu ki a civita Antiokea in landa Pisidia, ko-co, po ki ad-in religio-do tem sabato-di, mu sedi. 15 Po lekto de lega e de plu profeta, plu religio-do arki-pe bali a mu tem dice: "asocia vi: si es per vi u dice de spe a panto-pe, sti dice." 16 Po sti sta e kron face u sema per manu, Paulo dice: "Israel-fili vi e pe; qi este fobo de Teo: sti audi! 17 "Teo de panto Israel-fili pa elekti na plu patri e pa dona honora a panto-pe tem es in landa Egipto e duce mu ex id kon alti braki. 18 "Tem tetra-ze anua, An dura mu akti in deserta. 19 "Po destru seti demo in landa Kanaan, An dona a mu landa mero-po-mero. 20 "Ko panto-ci, po tetra-penta-ze anua, An dona plu judika-pe a profeta Samuel. 21 "Kron mu dice u petitio de regi, ko-co Teo pa dona Saul; fili de Kis e andro ex tribu Benjamin tem tetra-ze anua. 22 "Po apo an, An face regi David; po monstra testi, a qi An dice: '+Mi pa detekti David ex Jese un andro akorda Mi kardia. An fu akti Mi panto volu.+' [Kanta 89:20; 1 Samuel 13:14] 23 "Ex sperma de u-ci, Teo pa face a demo Israel u salva-pe Jesu, 24 "po Joane pa sti ski de bapti-ritu de penite a panto Israel-pe, pre An veni. 25 "Tem du ergo a buta, Joane dice: '+Vi doxo; mi es qo-pe? Mi ne es An, anti-co vide; An; Qi pedi-ve; mi ne es gru pro laxa, ki seqe mi.+' [Mataio 3:11; Luka 3:16] 26 "asocia vi e fili de Abraam racia ko panto-pe inter vi; qi este fobo de Teo: plu dice de salva pa gene bali a vi. 27 "Po ne ski plu voka de plu profeta; qi gene lekto tem panto sabato-di, e po akti judika anti An, plu Jerusalem-pe kon arki-pe pa face reali [plu-ci dice]. 28 "Po detekti zero kausa te cide An, mu dice a Pilato u petitio; cide An. 29 "Kron face ge-fini panto-ra; qi pa gene grafo de An, e po moti An ab xilo, mu pa moti An ad-in tafo. 30 "Teo pa leva ex panto morta-pe An; 31 "Qi monstra Se tem poli di a plu homi; qi pa ki kon An ab landa Galilaia a civita Jerusalem e qi nu es plu testi-pe a panto-pe. 32 "Na nu voci a vi u promise; ge-face a plu patri e Teo pa face reali a na; plu fili, per leva de Jesu. 33 "Iso es ge-grafo in Kanta bi: '+Tu es Mi Fili, ko-co Mi pa proto Tu nu-di.+' [Kanta 2:7] 34 "An leva ex panto morta-pe An; Qi ne fu ki versi a sapro, so An pa dice: '+Mi fu dona a Tu plu sura boni de David.+' [Isaia 55:3] 35 "Ka-co An dice in hetero: '+Tu ne fu lice; Tu sankti-Pe fu vide sapro.+' [Kanta 16:10] 36 "Veri, po dona servi a plu homi de auto tem per Teo volu, David pa gene somni e gene in-tera ko plu patri e vide sapro. 37 "Sed An; Teo pa leva, pa vide zero sapro. 38 "Asocia vi: ka-co sti gene u ski; per u-ci, u pardo de peka gene voci a vi. 39 "Per An, panto-pe; qi habe kredi, gene justi ab panto-ra; ab qi vi ne posi gene justi per Moses lega. 40 "Ka-co sti kura; ra; ge-dice per plu profeta, ne fu ki a vi: 41 "'+Mali-dice-pe vi: sti vide e sti mira e sto bio, ka Mi akti tem plu di de vi un ergo; de qi anti-co vi sio este kredi per zero mode, si pe dice id a vi.+'" [Habakuk 1:5] 42 Po plu Juda-pe ki ex religio-do, plu hetero demo dice u petitio; panto-la verba fu gene dice a mu tem seqe sabato-di. 43 Po plu religio-do-pe pa divide ki, poli Juda-pe e latri muta-religio-pe ki seqe Paulo e Barnaba; qi, tem dice a mu, sti akorda te dura in filo de Teo.

44 Kron u veni sabato-di, proxi un holo civita veni te audi Teo dice. 45 Po vide plu poli-pe, plu Juda-pe gene ple kon invidi e dice kontra plu ra; ge-dice ex Paulo, tem dice kontra e falsi. 46 Tem dice ko no-fobo, Paulo ko Barnaba dice: "Pa es nece: Teo dice gene dice proto a vi. Ka vi apo id e face se ne-valu de panto-tem bio, sti vide; na tropi se a plu hetero demo. 47 "Ka-co na Cefa pa dona a na u komanda: '+Mi pa fixa Tu homo foto de plu hetero demo, so Tu fu es u salva a plu maxi tele mero de geo.+'" [Isaia 49:6] 48 Tem audi, plu hetero demo-pe voci hedo e face glori na Cefa dice. Poli homi; qi pa gene fixa ad-in panto-tem bio, habe kredi. 49 Na Cefa dice gene fero dia holo landa. 50 Plu Juda-pe face excite plu latri gina e plu honora e proto-pe de u-la civita, ko-co mu sti noku anti Paulo e Barnaba, ko-co mu bali mu ex landa margina. 51 Po seiso pulve de pedi epi mu, mu ki a civita Ikonio. 52 Plu sko-pe gene ple kon hedo e ko Sankti-Spiritu.

14

1 Gene acide: ambi mu ki ad-in Juda religio-do in civita Ikonio e dice, so u mega qantita Juda-pe e Helena-pe gene kredi. 2 Plu no-kredi Juda-pe stimula e face ge-kako plu psiko de hetero demo anti plu asocia. 3 Ka-co mu du resta mega-tem no-fobo dice de na Cefa. Mu dice testi de verba de filo tem dona sema e mira; ge-akti per mu manu. 4 U mega qantita de civita gene divide. Uno qantita es ko plu Juda-pe e hetero qantita ko plu apostola. 5 Kron es u viole ex plu hetero demo e ex plu Juda-pe kon arki-pe te dice mali e jeti lito anti mu, 6 mu gene ski e fugi a plu civita Likaonia e Listra e Derbe ko peri landa. 7 La mu voci boni nova.

8 U certa andro; no-dina de pedi tem es klaudi ex matri uteri e qi gresi zero-kron, du sedi in civita Listra. 9 U-ci andro audi; Paulo dice. Po skope An e tem vide; an habe fide de sani, 10 an dice per mega voka: "Sti sta kon orto epi pedi!" An salta e gresi. 11 Po vide ra; Paulo pa akti, plu poli-pe sti voci per Likaonia lingua tem dice: "Po gene feno de andro, plu teo pa ki a na. 12 Mu dona a Barnaba u nima Zeo e a Paulo Herme, ka an es u duce de verba. 13 Po moti plu bovi e orna-zo, u Zeo hiera; qi es ante civita, ko plu poli-pe volu akti sakrifice. 14 Po audi e po skizo vesti, Barnaba e Paulo ki ko tako ad-in poli-pe tem voci 15 e dice: "Homi vi: qo-te vi akti panto-ci? Na es iso este homi ko vi. Na voci a vi; sti tropi se ab panto-ci vaku vice a vive Teo; Qi pa face un urani e u tera e u mari ko panto-ra in mu. 16 "Pre-tem An pa lice; panto demo akti auto ra. 17 "Para-co An ne linqi Se minus testi de akti boni tem dona a na ex urani plu pluvi- e karpe-tem e tem face ple na kardia per sito e hedo." 18 Tem dice panto-ci, mu proxi ne sto; plu poli-pe akti sakrifice. 19 Plu Juda-pe ki ex plu civita Antiokea e Ikonio. Po sti kredi in plu poli-pe e po bali lito anti Paulo, mu trakto an ex civita tem puta; an pa lose bio. 20 Po plu sko-pe ki peri an e po an sti sta, an ki a civita. Kron seqe di, An ki ko Barnaba a civita Derbe. 21 Po voci boni nova ad u-ci civita e po dona sko a poli homi, mu ki a plu civita Listra e Ikonio e Antiokea 22 tem face forti plu psiko de plu sko-pe e tem dona spe; dura per fide, e na nece ki dia poli turba a Teo regi-landa. 23 Po elekti a mu plu eklesia ante-pe e po dice preka ko sto-vora, mu dona mu liabili a na Cefa; de Qi mu habe kredi. 24 Po ki dia civita Pisidia, mu ki a landa Pamfilia. 25 Po dice in civita Perga, mu ki a civita Atalia. 26 Mu sti veli ex la a civita Antiokea; ex qi mu pa gene dona a Teo filo ad-in ergo; mu pre face ge-fini. 27 Po veni e po sti veni eklesia, mu dice nova de holo ra; Teo pa face ko mu, e An pa face ge-aperi a plu hetero demo u porta de fide. 28 Mu du es la ko plu sko-pe no-pusi-tem.

15

1 Po ki ab landa Juda, certa homi dona a plu asocia u sko: "Si vi ne gene peri-seka per Moses mode, vi ne fu gene salva." 2 Ka-co, po no-pusi turba e disputa gene acide a mu ex Paulo e Barnaba, mu face u decide; Paulo e Barnaba ko plu certa hetero homi fu ki de u-ci qestio a civita Jerusalem. 3 Veri ka-co, po gene bali akorda eklesia, mu ki dia plu civita Fenicia e Samaria tem re-dice u muta de plu hetero demo. Mu sti kausa de mega hedo a panto asocia. 4 Po ki a civita Jerusalem, mu gene bene-veni de eklesia ko plu apostola e ante-pe e sti ski de panto-ra; Teo pa akti ko mu. 5 Plu certa homi de mero Farisai; qi, tem dice, habe u kredi: "Akti peri-seka de mu e dona u komanda; tena Moses lega es nece." 6 Plu apostola e ante-pe pa sti veni te logi de u-ci dice. 7 Po poli disputa gene acide, Petro, po sti sta, dice a mu: "Asocia vi: vi du ski; po plu proto di, Teo inter na pa elekti; panto hetero demo fu audi per mi stoma u dice de panto boni nova e gene kredi. 8 "Teo; Qi du ski panto kardia, pa monstra testi a mu, tem dona Sankti-Spiritu a mu iso a na. 9 "An pa face zero difere inter na e mu po face puri kardia per fide. 10 "Ka-co qo-ka vi nu dona a Teo u stimula; moti epi kola de plu sko-pe u zigo; ni na plu patri ni na auto pa pote fero? 11 "Kontra-co na per filo de na Cefa Jesu Kristo habe u kredi de salva per iso mode de mu." 12 Un holo poli-pe habe silento e audi; Barnaba e Paulo re-dice plu sema e mira; Teo pa akti inter plu hetero demo per mu. 13 Po mu es silento, Jakob reakti tem dice: "Asocia vi: audi mi! 14 "Simeon pa re-dice u mode; per qi Teo proto-kron pa visita te cepti ex panto demo mo demo pro An nima. 15 "Plu verba de plu profeta dice akorda u-ci akorda grafo: '+Po panto-ci, Mi fu ki versi e fu re-tekto David religio-do; qi pa gene kade. 16 "'+Mi fu re-tekto plu ruina de id e fu sti sta id, 17 "'+te u resta homi fu tenta detekti na Cefa--plus plu hetero demo; epi qi Mi nima gene voci; ge-dice per Teo, Qi akti panto-ci.+' [Amos 9:11,12] 18 "Teo du ski Auto panto ergo po panto tem. 19 "Ka-co mi face u judika; ne dona turba a mu; qi ex plu hetero demo tropi se a Teo. 20 "Kontra-co grafo a mu u-ci; tena se ab no-puri de idoli e de matura-pe kako e de ge-tortu-kola [zoa] e de hema, 21 "ka, ex panto paleo generatio in panto civita, Moses habe plu homi; qi voci an tem lekto in plu religio-do panto sabato-di." 22 Po-co bali plu ge-elekti andro ex mu; Juda kon adi-nima Barsaba e Sila, ko Paulo e Barnaba a civita Antiokea feno boni a plu apostola e a plu ante-pe kon holo eklesia 23 po grafo per manu so: "Plu apostola ko plu ante-pe e plu asocia a plu homi in plu civita Antiokea e in landa Siria e in landa Cilicia e a plu asocia de plu hetero demo: saluta. 24 "Ka na pa audi; plu certa homi ex na, po ki ex, pa sti turba vi per verba; qi sti mali muta in psiko, tem dice; vi nece gene peri-seka e tena u lega-fa, e a qi na pa dice zero komanda, 25 "bali a vi plu ge-elekti andro ko ge-filo Barnaba e Paulo feno boni a na; qi pa sti veni ko mo akorda. 26 "Bi-ci homi pa sti risko a psiko pro nima de na Cefa Jesu Kristo. 27 "Ka-co na pa bali Juda e Sila; qi auto dice per verba u-ci, 28 "Ex-co dona a vi zero ma no-facili de panto-ci nece-ra feno boni a Sankti-Spiritu e a na: 29 "tena se ab idoli sacrifice-ra e ab hema ko ge-tortu-kola [zoa] e ab matura-kako; ab qi tena se; vi fu boni akti. Vale." 30 Ka-co, po gene lase ki ab, mu ki a civita Antiokea e, po sti veni grega, dona u-ci grama. 31 Po lekto, mu voci hedo kausa akorda. 32 Juda e Sila auto; qi es plu profeta, dona spe e face forti plu asocia per poli verba. 33 Po resta tem, mu gene lase ki ab ko paci ab plu asocia a plu apostola, 34 [anti] resta feno boni a Sila.

35 Paulo e Barnaba ko poli hetero homi du es in civita Antiokea tem dona sko e voci na Cefa verba. 36 Po plu certa di, Paulo dice a Barnaba: "Po ki versi, na fu akti kura de stato de plu asocia in panto civita; in qi na pa voci na Cefa dice." 37 Barnaba tende duce ko mu Joane; ge-nima Marko. 38 Paulo puta; ne duce u-la homi; qi pa ki ab mu ab landa Pamfilia e ne pa ki ad ergo. 39 Ka-co ta forti disputa gene acide; mu ki ab alelo, e, po duce Marko, Barnaba sti veli ad insula Kipro. 40 Po elekti Sila, Paulo ki avanti po gene liabili a Teo filo akorda plu asocia. 41 An ki dia landa Siria e Cilicia tem face forti plu grega.

16

1 An ki a plu civita Derbe e Listra. Vide; la es u certa sko-pe ko nima Timoteo; un an-fili de u certa kredi Juda gina sed de Helena patri 2 akorda testi de plu asocia in plu civita Listra e Ikoniu. 3 U-ci homi volu; Paulo ki kon an. Po duce an, an akti peri-seka kausa plu Juda-pe; qi es in plu-la loka, ka panto mu habe u ski; an patri es un Helena-pe. 4 Tem ki dia plu civita, mu dona a mu; tena plu doci; ge-decide akorda plu apostola e plu ante-pe in civita Jerusalem. 5 Ka-co plu grega gene forti de fide e gene multi tem plu-la di.

6 Po ki dia plu landa Frigia e Galatia e po gene veto de dice [Teo] dice in landa Asia-Minora akorda Sankti-Spiritu 7 e po ki longi landa Misia, mu tenta ki longi landa Bitinia. Sankti-Spiritu ne lice u-ci. 8 Po ki para landa Misia, mu ki a civita Troa. 9 Tem noktu, un idio vista gene a Paulo: u certa andro de landa Makedonia tem sta e tem dona u petitio tem dice: "Po ki a landa Makedonia, sti auxi a na!" 10 Kron vide un idio vista, na imedia tenta ki a landa Makedonia tem face u decide; na Cefa pa sti veni na te voci boni nova. 11 Ka-co, po sti veli ab civita Troa, na ki per rekti viagia a civita Samotracia e, tem seqe di, a civita Neapolis 12 e ex la a civita Filipi; qi es u proto civita de u-la mero de landa Makedonia e es u koloni. Na du es in u-ci civita tem plu certa di. 13 Tem sabato-di, na ki ex civita para fluvi; topo more es preka. Po sedi, na dice a plu gina; qi pa kolekti se. 14 U certa gina ko nima Lidia; u vendo-pe de ciano-rubi [vesti] de civita Tiatira e qi dona latri a Teo, audi. Na Cefa face aperi fe kardia te akti kura de dice akorda Paulo. 15 Po gene bapti-ritu ko [plu homi in] eko-lo, fe dona petitio tem dice: "Si tu pa detekti; mi es fide a na Cefa, po ki ad-in mi eko-lo, sti resta." Fe sti u-ci kredi in mu.

16 Acide: kron na ki a preka-lo, u certa fe-dulo gene inkontra ko na tem habe u divina spiritu. Fe duce mega pluto per divina a plu habe-pe. 17 Po ki seqe Paulo ko na, fe voci tem dice: "Panto-la homi es plu dulo de maxi alti Teo e dice a na u nova de salva mode." 18 Fe akti u-ci tem poli di. Tem este koleri e po tropi se ad u-ci spiritu, Paulo dice: "Mi dice a tu per nima Jesu Kristo u komanda; sti ki ab fe!" Id ki ex tem iso horo. 19 Kron vide; u spe de pluto pa ki ex, e po rapi Paulo e Sila, mu trakto mu a merka-lo a plu arki-pe. 20 Po duce mu a plu komanda-pe, mu dice: "Plu-la homi face turba in na civita tem es plu Juda-pe. 21 "Mu dice nova de plu more; de qi ni cepti ni akti es lega a na tem es plu Roma-pe." 22 U poli-pe sti surge anti mu. Po skizo plu vesti peri mu, plu komanda-pe dice u komanda; bate per flagela. 23 Po face poli stria, mu bali mu ad-in karcera tem dice a karcera duce-pe u komanda; tena asilu mu. 24 Po gene tali komanda, an bali mu ad-in intra-karcera e liga mu poda ad-in xilo-ra. 25 Proxi noktu meso e tem dice preka, Paulo e Sila kanta a Teo, tem plu ge-puni-pe audi mu. 26 Subito, es ta mega tera seiso; plu karcera funda gene seiso. Panto porta imedia gene aperi, ko-co panto liga-me gene laxa. 27 Kron gene vigi ex somni e vide ge-aperi plu karcera porta e po tira u gladia, u duce-pe nu-fu cide se tem puta; plu ge-puni-pe pa ki ko fugi. 28 Paulo voci per mega voka tem dice: "Akti zero kako a se! Ka panto na es ci." 29 Po petitio de foto, an ki in ko tako. Tem tremulo, an kade ante Paulo e Sila. 30 Po duce mu extra la, an dice: "Mi plu cefa: nece qo a mi, te mi gene salva?" 31 Mu dice: "Sti u kredi de na Cefa Jesu Kristo, ko-co tu fu gene salva--tu ko plu eko-lo-pe." 32 Mu dice na Cefa dice ad an e a panto-pe in eko-lo. 33 Po duce mu tem u-la noktu horo, an lava mu kausa plu stria, ko-co an ko panto auto homi imedia gene u bapti-ritu. 34 Po duce mu ad-in auto eko-lo, an prepara u tabla e sti hedo kon panto eko-lo-pe po gene kredi de Teo. 35 Po di gene proto, plu komanda-pe bali plu polica-pe tem dice: "Lase; plu-la homi ki ab!" 36 U karcera duce-pe re-dice panto-ci verba a Paulo: "Plu komanda-pe dice; vi fu ki ab. Nu ka-co, po ki ex, sti viagia ko paci." 37 Paulo dice a mu: "Po bate minus-kritici na ko publika e, tem na es plu Roma-pe, po jeti na ad-in karcera, qe mu nu bali ex ko kripto na? Ne u-ci kausa, kontra-co, po auto veni, mu fu duce na extra ci." 38 Plu polica-pe re-dice panto-ci verba a plu komanda-pe. Mu este fobo po audi; mu es plu Roma-pe. 39 Po veni, mu tenta detekti mu. Po duce ex, mu dice u petitio; ki ex civita. 40 Po ki ex karcera, mu ki a Lidia. Po vide plu asocia, mu dice spe e ki ex.

17

1 Po ki dia plu civita Amfipoli e Apolonia, mu ki a civita Tesalonika; topo es u religio-do de plu Juda-pe. 2 Akorda more, Paulo ki a mu, ko-co, tem tri sabato-di, an dice a mu u logika ex plu Grafo 3 tem face klari e monstra; Kristo pa nece gene algo e pa gene leva ex plu morta-pe e: "U-ci Jesu es Kristo; de Qi mi dice nova a vi." 4 Plu certa mu gene kredi. Mu ko poli-pe de plu latri Helena-pe e de non-oligo proto gina face u grega ko Paulo e Sila. 5 Po este kako zelo e po duce plu certa kako andro ex plu anti-ergo-pe e po face u poli-pe, plu ne-kredi Juda-pe sti excite u civita. Po akti viole anti eko-lo de Jasono, mu stimula; mu duce mu a demo. 6 Po ne detekti mu, mu duce ko trakto Jasono ko plu certa asocia a plu arki-pe tem voci: "Plu-la homi; qi pa sti konfusi inter panto-pe, pa ki a ci. 7 "Jasono pa cepti mu. Panto-ci homi akti kontra plu dice de Cesari tem dice es un hetero Regi Jesu." 8 Mu face ge-turba u poli-pe e plu arki-pe, po mu audi panto-ci. 9 Po gene tena-ra ex Jasono e ex plu hetero homi, mu lice; mu ki ab. 10 Subito tem noktu, plu asocia bali ex a civita Berea Paulo e Sila. Kron veni, mu ki ad-in religio-do de plu Juda-pe. 11 Panto-la homi es ma boni de plu homi in civita Tesalonika. Mu cepti [Teo] dice kon holo zelo tem skope plu Grafo tem panto di [te verifi]; qe panto-ci es plu-la ra. 12 Veri, poli homi ex mu ko non-oligo honora Helena gina e andro gene kredi. 13 Po gene u ski; u nova de Teo dice akorda Paulo gene ski in civita Berea, plu Tesalonika Juda-pe sti veni a la tem face koleri plu poli-pe. 14 Kron plu asocia bali ex ko subito Paulo, te an sti viagia epi mari. Sila e Timoteo dura la. 15 Plu duce-pe face; Paulo ki a civita Atena. Po gene a mu u komanda; sti ki ko tako ad an, Sila e Timoteo ki ex.

16 Tem atende mu in civita Atena, Paulo este stimula de auto spiritu tem vide; u civita es ple ko plu idola. 17 Veri ka-co an monstra logika in religio-do ko plu Juda-pe e ko plu latri-pe plus in merka-lo a plu ko-sedi-pe. 18 Plu Epikure e Stoiko filo-sofi-pe gene inkontra kon an. Certa mu dice: "U-la tro-dice-pe volu dice qo?" Mu dice: "An feno es u nova-pe de plu xeno diabola," ka an dice a mu u nova de Jesu e de ana-sta. 19 Po kapti, mu duce an ana buno Are tem dice: "Qe na pote gene ski de neo doci; qi gene dice akorda tu? 20 "Akorda-co tu moti plu certa xeno ad-in na oti. Ka-co na volu habe u ski; panto-ci ra habe qo semani." 21 Panto Atena-pe ko plu resta xeno-pe spende libe tem per zero hetero ra vice dice e audi ali neo ra. 22 Po sti sta in meso de buno Are, Paulo dice: "Atena-an vi: mi vide; vi es falsi religio de panto-ra. 23 "Ka, tem ki dia e tem vide plu buta de vi latri, mi pa vide u tabla; epi qi es ge-grafo: A NE-GE-SKI TEO. Ka-co mi dice nova a vi de u-ci; a Qi vi dona latri minus ski. 24 "Teo; Qi pa akti u krea de geo ko panto-ra in id tem es u Cefa de urani e geo, du eko ne in manu-ge-face religio-do 25 "ni gene servi per homi manu tem sio nece uno-ra e tem Auto dona bio e spira a panto-ra akorda panto-ra. 26 "An pa face ex mo hema panto homi demo, te mu habe eko epi holo facia de geo po face plu pre-ge-decide tem e margina de eko-lo 27 "e te mu tenta detekti u Cefa, si mu sio tenta gene este de An e sio detekti An, anti An es ne tele ab panto na. 28 Akorda-co na habe bio e ki e es, homo plu certa poesi-pe inter vi pa dice: 'Akorda-co na es plu fili de u-ci Homi.' 29 "Ka-co, tem es plu fili de Teo, na ne debi puta; Teo es homo kriso alo argenti alo lito--u ge-forma ra de homi arti e imagi. 30 "Veri ka-co, po ne volu vide plu ne-ski tem, Teo nu dice u komanda; panto homi panto-lo dice penite. 31 "Ka An pa face sura u di; tem qi An fu face judika de panto-pe per justi e per Andro; An pa elekti po dona a panto-pe u verifi; An pa leva An ex panto morta-pe." 32 Po audi ana-sta de morta-pe, veri, mu sti ridi, ko-co mu dice: "Na fu itera audi tu de u-ci." 33 Per u-la mode, Paulo ki ex mu meso. 34 Tem face u grega kon an, plu certa homi; inter qi es un Are-pe Dionisio e u gina ko nima Damara plus ko mu plu hetero homi, gene kredi.

18

1 Po panto-ci e po sti viagia, Paulo ki ex civita Atena a civita Korinto. 2 Po detekti u certa Juda-an ko nima Aqila; qi es de racia Ponto e, po brevi tem, pa ki ab landa Italia, ka Klaudio pa dice u komanda; panto Juda-pe sti viagia ex civita Roma, kon auto gina Priscila. 3 Ka es de homo tekno, an du eko ko mu e akti ergo, ka mu habe te-do tekno. 4 An dice logika in religio-do tem panto sabato-di e sti kredi in plu Juda-pe e Helena-pe. 5 Kron Sila e Timoteo veni ab landa Makedonia, Paulo este fo stimula in auto spiritu tem dice a plu Juda-pe u testi; Jesu es Kristo. 6 Tem mu face se sura anti an e tem mu dice falsi, e po seiso vesti, Paulo dice a mu: "Vi hema epi vi kefa! Tem ne habe liabili, mu nu ki a plu hetero demo." 7 Po ki ex la, an ki ad-in eko-lo de certa latri-Teo-pe ko nima Justo; qi eko-do habe unio ko religio-do. 8 U religio-do arki-pe Krispo ko panto eko-lo-pe gene kredi de na Cefa. Tem audi, poli Korinto-pe gene kredi e gene u bapti-ritu. 9 Per un idio vista tem noktu, na Cefa pa dice a Paulo: "Ne este fobo sed dice e ne es silento, 10 "ka Mi es ko tu, ko-co nuli-pe fu gene vikto supra tu te kako uti tu e ka es poli homi pro Mi in u-ci civita." 11 An du resta tem mo anua plus sixa meno tem dona sko de Teo verba inter mu.

12 Tem Galio es u krati-pe de landa Akaia, plu Juda-pe sti surge kon akorda anti Paulo e duce an a judika-lo 13 tem dice: "Ultra lega, u-la homi sti u kredi; panto homi debi dona latri a Teo." 14 Pusi-tem pre Paulo volu aperi stoma, Galio dice a plu Juda-pe: "Juda-pe vi: si veri kausa certa no-justi alo kako krimi, akorda logika, mi fu sio dura ko vi. 15 "Si es u qestio de verba e de plu nima e de lega akorda vi--vi auto sti kura, ka mi ne volu es u judika-pe de panto-ci." 16 An ago mu ab judika-lo. 17 Po rapi u religio-do arki-pe Sostene, panto Helena-pe bate an ante judika-lo. Panto-ci feno es zero kura a Galio.

18 Po resta tem poli di, Paulo dice vale a plu asocia e ki per veli a landa Siria. Priscila kon Aqila; qi pa razo kefa in civita Kenkrea, ka an habe u jura, ki kon an. 19 An ki a civita Efeso e ki ab mu la. Po ki ad-in religio-do, an dice logika ko plu Juda-pe. 20 Po mu dice u petitio; qe an fu resta kon an ma mega tem, an ne dice akorda. 21 Kontra-co an dona vale tem dice: "Mi nece per panto mode fu es in celebra in civita Jerusalem. Mi fu ki versi vi, si Teo volu. An ki per veli ab civita Efeso. 22 Po ki epi tera a civita Cesarea e po dice saluta a Kristo-pe grega, an ki a civita Antiokea. 23 Po resta u certa tem, an ki ex e ki dia plu landa Galata e Frigia ko sistema tem face forti panto sko-pe.

24 U certa Juda-pe ko nima Apolo; ge-nati un Alexandria-pe e u logi andro, ki a civita Efeso tem es dina per plu Grafo. 25 An gene sko de na Cefa mode e, tem habe zelo spiritu, dice e dona sko ko korekti de plu ra de na Cefa po gene solo Johane bapti-ritu. 26 An proto dice ko koragi in religio-do. Po audi an, Aqila ko Priscila duce an e face ma korekti ad an u mode de Teo. 27 Tem an tende ki a landa Akaia, plu asocia grafo a plu sko-pe te urge; mu cepti an. Po veni, an dona mega auxi a plu homi; qi habe kredi per filo. 28 Akorda-co an dice disputa ko plu Juda-pe per dina tem monstra per plu Grafo: Jesu es Kristo.

19

1 Acide tem Apolo es in civita Korinto: po ki dia plu ma alti mero, Paulo ki a civita Efeso. Po detekti plu certa sko-pe, 2 an dice a mu: "Qe vi pa gene Sankti-Spiritu po gene kredi?" Mu dice ad an: "Na klu ne audi; qe es Sankti-Spiritu." 3 An dice a mu: "Vi gene bapti-ritu ad-in qo?" Mu dice: "Ad-in Joane bapti-ritu." 4 Paulo dice: "Veri, Joane akti bapti-ritu de penite tem dice a panto-pe; mu debi habe kredi de An; Qi ki seqe an--u-la es de Kristo Jesu. 5 Po audi, mu gene bapti-ritu ad-in nima de na Cefa Jesu. 6 Po Paulo moti manu epi mu, Sankti-Spiritu ki epi mu, ko-co mu dice de sankti-ra per plu lingua. 7 Panto andro [qantita] es cirka mo-bi. 8 Po ki ad-in religio-do, an dice ko koragi tem tri meno e tem dice logika e sti kredi de plu ra de Teo regi-landa. 9 Po ne volu kredi, plu certa homi dice kako de u-la mode ante poli-pe. Po ki ab mu, an face divide inter plu sko-pe tem dice logika panto-di in sko-do de certa Tirano. 10 U-ci gene acide tem bi anua, so panto-pe; qi habe eko in Asia-Minor, Juda-pe e Helena-pe, audi na Cefa Jesu verba. 11 Teo pa akti ne-norma dina per Paulo manu, 12 so klu plu mero-te alo alexi-ve gene fero ab an derma a pato-pe, ko-co plu pato ki ab mu e plu kako spiritu ki ab mu. 13 Plu certa vaga Juda-pe; qi apo diaboli, tenta dice u nima de na Cefa Jesu epi plu homi; qi habe plu kako spiritu tem dice: "Na dice komanda a vi per Jesu; Paulo voci." 14 Plu certa seti fili de Juda arki-hiera Skeua akti u-ci. 15 Tem reakti, u kako spiritu dice: "Mi du ski Jesu e pa gene ski de Paulo. Vi es qo-pe?" 16 Tem salta epi mu, un homi; in qi es u kako spiritu e po gene es u cefa supra mu, gene domina supra mu, so nudi e ge-vulne mu ki ko fugi ex domi. 17 U-ci gene ski a panto Juda e Helena eko-pe in civita Efeso. Fobo gene acide in panto mu, ko-co u nima de na Cefa Jesu gene mega. 18 Poli kredi-pe veni tem dice akorda e sti ski de mu akti. 19 Po fero plu bibli, poli magika-pe sti piro epi mu ante panto-pe. 20 So akorda dina, na Cefa verba gene ma mega e gene domina.

21 Po panto-ci gene fini, Paulo in auto spiritu tende ki a civita Jerusalem po ki dia plu landa Makedonia e Akaia tem dice: "Po es la, mi nece vide u civita Roma." 22 Po bali a landa Makedonia bi servi-pe Timoteo e Erasto, an du resta tem in landa Asia-Minor. 23 Acide u-la tem: no-pusi turba de na mode. 24 De-co u certa homi; un argenti-pe ko nima Demetrio, tem face plu argenti imagi de Artemia, duce a plu arti-pe no-pusi profito. 25 An sti veni de plu ergo-pe de iso-ra e dice: "Andro vi: vi ski; na pluto es ex u-ci profito. 26 "Vi vide e audi; Paulo pa stimula ab-tropi de poli-pe ne solo in civita Efeso sed in proxi panto landa Asia-Minor tem dice; panto teo; ge-face per manu, ne es plu teo. 27 "Ne solo u-ci gene mali re-dice sed u religio-do de importa teo Artemia gene muta a nuli-ra es risko a na. U grandi de fe; a qi panto landa Asia-Minor e panto homi du dona latri, fu gene destru." 28 Po audi e po gene ple per koleri, mu voci tem dice: "Importa Artemia de civita Efeso!" 29 Un holo civita gene ple per no-logi. Mu tako ki kon akorda ad-in teatra po rapi Gaio e Aristarko; bi Makedonia-pe e ko-viagia-pe de Paulo. 30 Paulo tende ki a panto civi. Plu sko-pe ne lice u-ci. 31 Plu certa arki-pe de Asia-Minor, tem es plu ami ad an e po bali ad an, stimula; an ne tenta ki ad-in u-la teatra. 32 Plu homi voci uno ra e plu homi voci hetero ra. U grega habe no-logi, ko-co u pleisto ne ski; qo-ka mu pa sti veni. 33 Mu duce ante ex poli-pe Alexandro, tem plu Juda-pe pulsa an. Po face u sema per manu, Alexandro volu dice explika a panto civi. 34 Po gene ski; an es u Juda-pe, mu du voci tem bi horo, ko-co mo soni gene acide ex panto-pe: "Importa Artemia de civita Efeso!" 35 Po sti kalma, u grafo-pe dice a poli-pe: "Panto Efeso-an: es qo andro; qi ne ski; u civita Efeso es plu kura-pe de religio-do de teo Artemia e de ra; qi pa kade ex Zeo? 36 "Ka-co, tem ne es dice anti panto-ci, vi nece habe kalma e nece akti nuli-ra ko tako. 37 "Akorda-co vi pa duce panto-ci andro; qi ni es religio-do klepto-pe ni dice mali anti vi teo. 38 "Veri, si Demetrio kon auto plu arti-pe habe u verba anti uno-pe, plu lega-korta du ergo, ko-co es plu lega-pe--lase; mu dice etio anti alelo. 39 "Si vi habe qestio de hetero ra, u-ci fu gene solve in lega grega. 40 "Ka-co na habe u risko; gene un etio de no-lega grega kausa u-ci di, ko-co es zero kausa; na fu pote dona de u-ci disputi." 41 Po dice panto-ci, an bali ab u grega.

20

1 Po u rabi poli-pe gene sto e po Paulo sti veni de plu sko-pe e po dice saluta, Paulo ki ab a landa Makedonia. 2 Po ki dia plu-la mero e po dice poli spe, an ki a landa Helena. 3 Po resta tem tri meno e po u skema gene face ex plu Juda-pe, kron mu es prepara te sti veli a landa Siria, u kausa; ki versi dia landa Makedonia, gene surge. 4 U Boroia-pe Sopater e u Tesalonika-pe Aristarko ko Sekundo e Derbaio-pe Gaio e Timoteo ko Asia-Minor-pe Tikiko e Trofimo ki kon an ad Asia-Minor. 5 Po ki ante, panto-la homi atende na in civita Troa. 6 Po plu zero-zima di, na sti veli ab civita Filipi e gene veni a mu po penta di in civita Troa; topo na resta tem seti di.

7 Kron u di mo po sabato-di e po plu sko-pe pa veni te dona pani, Paulo dona sko a mu; qi fu ki fu-di. An dura sko a noktu meso. 8 Es poli lampa in supra kamera; topo mu es kon alelo. 9 Tem sedi in fenestra, uno juve andro ko nima Eutiko gene infra forti somni, tem Paulo dona sko mega tem. Po gene infra somni, an kade ab pedi-lo tri e gene fero morta. 10 Po ki kata, Paulo kade epi an. Po moti braki peri an, an dice: "Ne este turba, ka an psiko es in an." 11 Po ki ana e po dona pani e po vora e po dona konversa a-kron aurora, an ki ab. 12 Mu fero vive u ju-an e gene no-pusi konsola.

13 Po ki ante mu ad-in navi, na sti veli a civita Aso ko prepara; te gene Paulo, ka an pre face u skema; an fu ki per pedi. 14 Po an gene unio ko mu in civita Aso e po gene an, na ki a civita Mitilene. 15 Po sti veli ab la, u seqe di na sti veni a loka trans inslua Kio. Kron seqe di na sti veni ad insula Samos. Po resta in urba Trogilio, u seqe di na ki a civita Mileto, 16 ka Paulo pa face u decide; te ki per veli ultra civita Efeso, so ne fu acide: an spende tem in Asia-Minor, ka an ki ko tako te posi es in civita Jerusalem tem Pentekosta di.

17 Po bali ab civita Mileto ad-in civita Efeso, an sti veni de plu ante-pe de eklesia. 18 Po mu ki ad an, an dice: "Vi habe u ski; po di mo; kron mi gene veni a landa Asia-Minor, u mode; mi pa es ko vi panto-tem, 19 "tem dona servi a na Cefa ko panto humili e ko poli lakrima e stimula a mali--panto-la gene acide a mi per plu skema de plu Juda-pe-- 20 "e u mode; mi tena nuli-ra; qi habe valu, te ne sti ski [de u-ci] a vi sed te dona sko a vi ko publika ab domi a domi, 21 "tem solemni dice a Juda-pe e ad Helena-pe u testi de na Cefa Jesu Kristo. 22 "Nu sti vide; mi; ge-liga ex Spiritu, ki a civita Jerusalem tem ne du ski plu ra; qi fu gene acide a mi, 23 "exklude Sankti-Spiritu monstra testi in panto civita tem dice; liga-ra e turba du atende mi. 24 "Kontra-co mi ne doxo importa u-ci e ne doxo importa a se auto bio. Per u-ci mode, mi fu face ge-fini mi ergo kon hedo e ge-fini mi servi; mi pa gene ex na Cefa Jesu: dona testi de plu boni nova de Teo filo. 25 "Sti vide; mi nu ski; panto vi; inter qi mi pa face ge-ski Teo regi-landa, fu vide mi facia zero-kron. 26 "Ka-co mi dice a vi tem u-ci di u testi; mi es puri ab panto-pe hema. 27 "Ka mi ne pa tena ab vi u nova de panto konsili ex Teo. 28 "Ka-co este kura a vi e ad holo grega; in qi Teo pa face duce vi te es plu pastora de Teo eklesia; An pa merka per Auto hema. 29 "Ka mi habe u ski; po mi ki ab, plu noku lupus fu akti veni a vi tem ne dona civili a grega. 30 "Ex vi auto, plu homi; qi dice de kako muta te sti trakto de plu sko-pe seqe se, fu gene surge. 31 "Ka-co sti skope tem habe u memo; tri anua tem noktu e di, mi ne pa sto dice monito ko lakrima a panto-pe. 32 "Asocia vi: mi nu dona liabili de vi a Teo e ad An filo verba; qi pote face forti e pote dona a vi u geneti inter panto sankti-pe. 33 "Mi pa volu kriso alo vesti de nuli-pe. 34 "Vi auto tena u ski; mi manu pa dona servi a mi nece e a nece de plu homi; qi es ko mi. 35 "Mi pa monstra panto-ra a vi, so vi nece dona auxi a panto debili-pe e so vi fu sti u memo de plu verba de na Cefa Jesu; Qi Auto pa dice: 'Dona es ma hedo de gene.'" 36 Po dice panto-ci e po sta epi genu ko panto mu, an dice preka. 37 Es poli lakrima ex panto-pe. Po peri-braki ko Paulo, mu dona oskula. 38 Mu este maxi tristi kausa ge-dice verba; mu ne fu vide an facia. Mu ki kon an a navi.

21

1 Po veli gene acide e po gene trakto ab mu e po rekti ki, na sti veni a civita Ko, tem seqe di a civita Rodo e ex la a civita Patara. 2 Po detekti u navi tem ki a landa Fenika e po ki in navi, na sti veli. 3 Po gene vide de insula Kipro e ki a laevo, na sti veli a landa Siria e ki epi civita Tiro, ka la u navi apo kargo. 4 Po detekti plu sko-pe, na du resta la tem seti di. Mu dice per Spiritu a Paulo; ne ki a civita Jerusalem. 5 Kron seti di gene fini e po ki ex, na face viagia, tem panto-pe ko gina e fili ki ko na ex civita. Po sta epi genu epi kosta, na dice preka. 6 Po dice vale ad alelo, na ki ad-in navi, ko-co mu ki versi auto eko-lo. 7 Po face ge-fini u viagia ab civita Tiro, na sti veni a civita Ptolema. Po dice saluta a plu asocia, na resta tem mo di ko mu. 8 Kron seqe di e po ki ex, Paulo ko plu homi peri an sti veni a civita Cesarea. Po ki ad-in domi de sti-ski-pe Filipo; qi es ex u-la seti, na resta kon an. 9 Tetra virgo fe-fili; qi du pre-dice, es de u-ci homi. 10 Tem na resta poli di, u certa profeta ko nima Agabo ki ab landa Juda. 11 Po veni a na e po apo Paulo soma-zo e po sti liga de auto manu e pedi, an dice: "Sankti-Spiritu dice u-ci: 'Plu Juda-pe fu face ge-liga in civita Jerusalem per u-ci mode un andro; de qi es u soma-zo, ko-co mu fu dona an ad-in manu de plu hetero demo.'" 12 Po audi panto-ci, na e plu eko-pe dice u petitio; an ne ki a civita Jerusalem. 13 Paulo reakti: "Tu face qo tem lakrima e tem frakti mi kardia? Mi habe prepara ne solo te gene liga sed te lose bio in civita Jerusalem kausa nima de na Cefa Jesu." 14 Po an ne gene na kredi, na es silento tem dice: "Na Cefa volu fu gene acide."

15 Po panto-ci di e po gene kargo, na ki a civita Jerusalem. 16 Plu sko-pe ex civita Cesarea ki ko na tem duce ko mu Mnason; u longi-tem sko-pe, ko qi na fu habe eko. 17 Po na sti veni a civita Jerusalem, plu asocia cepti na kon hedo. 18 Tem seqe di, Paulo ko na ki a Jakob, ko-co panto ante-pe sti veni. 19 Po dice saluta, an dice panto histori de ra; Teo pa akti per an servi in plu hetero natio. 20 Po audi, mu dona glori a Teo. Mu dice: "Asocia: tu vide; es poli Juda poli-pe; qi pa gene kredi, ko-co panto mu es plu zelo-pe de na lega. 21 "Mu pa gene ski de tu; tu dona a plu Juda-pe inter panto hetero demo u doci anti Moses tem dice; mu ne akti peri-seka de infanti e mu ne akti akorda more. 22 "Ka-co es qo? Supra panto-ra, u poli-pe fu sti veni, ka mu fu gene audi de tu veni. 23 "Ka-co sti akti de u-ci ra; na dice a tu: ko na es tetra andro; qi habe u jura. Po duce panto-ci, gene puri-ritu ko mu e dona paga pro mu, te mu akti razo de kefa. 24 "Ko-co panto-pe fu gene u ski; u ra; de qi mu pa gene info, es nuli-ra e kontra-co tu auto du akti akorda na lega. 25 "Na pa grafo de hetero-demo kredi-pe tem face judika; mu obe zero tali ra exklude tena se ab idoli sakrifice-ra e ab hema e ge-sto-aero [zoa] e ab matura kako." 26 Po-co e po duce panto-la andro tem seqe di e po gene puri-ritu ko mu, Paulo ki ad-in religio-do tem dice nova de fini de panto di de puri-ritu, a-kron u sakrifice gene dona pro panto mu. 27 Kron panto-la seti di es prepara pro fini e po vide an in religio-do, plu Juda-pe ab Asia-Minor stimula holo poli-pe. Mu moti manu epi an 28 tem voci: "Israel-fili vi: auxi! U-la es un homi; qi dice doci panto-lo anti panto na e anti na lega e anti u-ci loka. Plus an pa duce plu Helena-pe ad-in religio-do e face kako u-ci sankti loka." 29 Mu pre vide kon an in civita un Efeso-pe Trofimo; mu doxo; Paulo pa duce ad-in religio-do. 30 Holo civita pa gene stimula. Panto-pe ki ko dromo. Po rapi Paulo, mu trakto an ex religio-do. Plu porta imedia gene klude. 31 Tem mu tenta cide an, nova ki a kilo-kapitana de arme mero: holo civita Jerusalem habe rabi. 32 Po duce plu soldata ko mu hekto-kapitana para an, an imedia ki epi mu. Po vide u-la arki-cefa ko plu soldata, mu sto bate Paulo. 33 Po ki proxi, u-la arki-cefa rapi an e dice u komanda; an gene liga per bi katena. An dice qestio; an es qo-pe e an pa akti qo. 34 Uno-pe voci uno-ra e hetero-pe voci hetero-ra in poli-pe. Tem ne gene sura kausa rabi, an dice u komanda; an gene duce ad-in forti-do. 35 Po ki epi skala; an gene fero ex plu soldata kausa poli-pe viole. 36 Ka u-la poli-pe ki seqe tem voci: "Apo an!"

37 Tem es prepara te gene duce ad-in forti-do, Paulo dice ad arki-cefa: "Qe es lice; mi dice a tu uno-ra?" An dice: "Qe tu habe ski de Helena lingua? 38 "Ka-co tu ne es u-la Egipto-pe; qi pa sti turba pre panto-ci di e duce tetra-kilo cide-an ad-in sika-lo." 39 Paulo dice: "Veri, mi es u Juda-an de civita Tarso de landa Cilicia--u civi de fo importa civita. Mi dice a tu u petitio; sti lice; mi dice a panto-pe." 40 Po an dona lice, Paulo sta epi skala e face manu sema a panto-pe. Po forti silento gene acide, an dice a mu per Hebre lingua tem dice:

22

1 "Fratri e patri vi: sti audi mi alexi verba a vi." 2 Po audi; an dice ante mu per Hebreo lingua, mu tena ma silento. An dice: 3 "Veri, mi es u Juda-an; ge-nati in civita Tarso de landa Cilicia sed ge-eduka in u-ci civita infra Gamaliel po gene doci akorda exakti de na patri lega tem es u zelo-pe de Teo, iso panto vi es nu-di. 4 "Mi pa akti noku anti u-ci mode, tem liga e dona a plu karcera plu andro e gina, 5 "homo u cefa arki-hiera ko panto ante-pe habe testi de mi. Mi pa gene plu grama ex mu a plu asocia, ko-co mi pa ki a civita Damasko te duce ge-liga mu la a civita Jerusalem, te mu fu gene puni. 6 "Pa gene acide a mi tem viagia e tem ki proxi civita Damasko: kron meso-di ko subito, u forti foto gene dona ex urani peri mi. 7 "Mi kade a tera e audi u soni; qi dice e mi: 'Saul, Saul: tu akti noku anti Mi qo-te?' 8 "Mi reakti: 'Sinior: tu es qo-pe?' An dice a mi: 'Mi es u Nazaret-pe Jesu; anti Qi tu akti noku.' 9 "Panto homi ko mi veri vide u-la foto e este fobo sed ne audi u soni de dice-Pe a mi. 10 "Mi dice: 'Mi akti qo, mi Cefa?' Na Cefa dice a mi: 'Po sti sta, sti ki a civita Damasko, ko-co la tu fu gene dice de panto-ra; qi gene skema, te tu akti mu.' 11 "Po ne pote vide kausa glori de u-la foto e tem gene duce per manu de panto-pe ko mi, mi ki a civita Damasko. 12 "U certa andro Anania; fo religio akorda na lega e habe testi ex panto eko Juda-pe, 13 "tem veni a mi e tem sta, dice a mi: 'Fratri Saul: sti skope ana!' Kron iso horo, mi skope ad an. 14 "An dice: 'Na patri Teo pa elekti tu te gene ski de An volu e te vide u justi-Pe e te audi u soni ex An stoma, 15 "'so tu fu es u testi-pe a panto homi de ra; tu pa vide e pa audi. 16 "'Qo-te tu gene po-kron? Po sti sta, sti gene u bapti-ritu e apo tu peka per lava tem voci a nima de na Cefa!' 17 "Gene acide a mi: po ki versi civita Jerusalem e tem dice preka in religio-do, mi gene in trance. 18 "Mi vide An tem dice a mi: 'Sti tako e sti ki ko tako ex civita Jerusalem, ka mu ne fu cepti tu testi de Mi.' 19 "Mi dice: 'Mi Cefa: mu habe u ski; mi pa duce ad-in karcera e pa bate in panto religio-do plu kredi-pe de Tu. 20 "'Kron un hema de Tu testi-pe Stefan pa gene fusi, mi sta e dona akorda a cide e tena plu vesti de plu cide-pe.' 21 "An dice a mi: 'Sti ki, so Mi bali tu a plu tele hetero demo.'"

22 Mu audi an a-kron u-ci verba. Mu sti voci tem dice: "Apo u-ci homi ab geo, ka ne es gru: an habe bio." 23 Tem mu voci e apo plu vesti e jeti pulve ad-in aero, 24 u-la kilo-kapitana dice u komanda; an gene duce ad-in forti-do tem demanda; an gene qestio per flagela, so an fu gene u kausa; mu voci anti an so. 25 Tem mu sti liga an per derma-fi, Paulo dice a sta-proxi hekto-kapitana: "Qe es lega; vi bate u Roma e ne-ge-judika homi per flagela?" 26 Po audi e po ki ab, u-la hekto-kapitana dona info a kilo-kapitana tem dice: "Vide u ra, tu prepara akti, ka u-ci homi es u Roma-pe." 27 Po ki ante, u-la kilo-kapitana dice ad an: "Sti a mi dice; qe tu es u Roma-pe." An dice: "Ja." 28 U-la kilo-kapitana reakti: "Mi pa merka u-ci civi-stato per mega preci." Paulo dice: "Mi es ge-nati." 29 Mu; prepara akti qestio, imedia ki ab an. U kilo-kapitana este fobo po gene u sura; an es u Roma-pe, e ka an pa face ge-liga an. 30 Kron u seqe di e tem volu ski u sura; qo-ka an gene etio ex plu Juda-pe, an sti laxa an ex plu liga. An dice u komanda; plu arki-hiera e un holo koncili sti veni. Po duce an, an duce Paulo a mu.

23

1 Tem vide ko kura u koncili, Paulo dice: "Asocia vi: mi pa akti kon holo boni auto-kritici a Teo a u-ci di." 2 U cefa arki-hiera Anania dona a para-pe u komanda; bate an stoma. 3 Po-co Paulo dice ad an: "Teo fu bate tu, ge-puri extra-lo! Tu sedi te akti judika akorda lega, ko-co, kontra lega, tu dona u komanda; mi gene bate." 4 Plu para-pe dice: "Qe tu mali-dice Teo arki-hiera?" 5 Paulo dice: "Mi ne habe u ski; an es un arki-hiera. Ka es ge-grafo: '+Tu ne fu dice kako u natio arki-pe.+'" [Ki-ex 22:28] 6 Po ski; uno mero es Sadukai e hetero Farisai, Paulo voci in koncili: "Asocia vi: mi es u Farisai e fili de Farisai. Mi gene judika de spe; ana-sta de morta-pe." 7 Po dice u-ci, es disputa de Farisai e Sadukai, ko-co u poli-pe gene divide. 8 Ka, veri, plu Sadukai dice; ne es ana-sta plus ni angeli ni spiritu. Plu Farisai konfesi bi-ci. 9 Es u mega voci. Po sti sta, plu religio-tekno-pe de Farisai mero face disputa, tem dice: "Na detekti zero kako in u-ci homi. Si u spiritu alo un angeli pa dice ad an, na ne fu face disputa anti Teo." 10 Tem u mega disputa gene acide e tem u kilo-kapitana este fobo; Paulo gene skizo kausa mu, an dice u komanda; po ki kata, duce an per dina ex meso e duce an ad-in forti-lo. 11 Tem sta para an tem seqe noktu, na Cefa dice: "Habe koragi, Paulo. Per u-la mode tu pa dice testi de Mi in civita Jerusalem, so tu fu nece dice testi in civita Roma."

12 Kron di e po face u grega, plu Juda-pe moti se infra jura tem dice; mu ne fu bibe alo vora a-kron cide Paulo. 13 Es ma de tetra-ze; qi pa face u-la kripto grega. 14 Po ki a plu arki-hiera e a plu krati-pe, mu dice: "Na pa face se infra jura; na fu vora nuli-ra a-kron cide Paulo. 15 "Ka-co vi kon koncili nu sti veni a kilo-kapitana, te an fu duce an a vi fu-di, homo vi fu sio es prepara te dice ma boni qestio de an. Pre an fu ki proxi, na habe prepara te cide an." 16 Po audi e po veni e ki ad-in forti-do, Paulo sorori an-fili dice u nova de atende grega a Paulo. 17 Po sti veni mo ex plu hekto-kapitana, Paulo dice: "Sti duce u-ci juve andro a kilo-kapitana, ka an habe nova." 18 Veri, po duce a kilo-kapitana, an dice: "Po sti veni mi, u karcera-pe Paulo pa dice u petitio; sti duce a tu u-ci juve andro; qi habe u dice a tu." 19 Po tena an manu e po ki ad idio loka, u kilo-kapitana dice u qestio: "U nova; tu habe, es qo?" 20 An dice; plu Juda-pe pa face un akorda; dice a tu u petitio; qe tu fu duce Paulo a koncili homo sio es prepara de ma boni qestio de an. 21 "Ka-co ne gene kredi ex mu, ka un atende grega ex mu; qi pa dice u jura; ni vora ni bibe a-kron cide an, es ma de tetra-ze." 22 Ka-co u kilo-kapitana lase; u juve-andro ki ab po dice u komanda: "Dice a nuli-pe panto-ci; tu pa monstra a mi." 23 Po sti veni bi certa hekto-kapitana, an dice: "Sti prepara bi-hekto soldata te ki a civita Cesarea plus seti-ze Equs-soldata ko bi-hekto lance-soldata kron horo tri de noktu. 24 "Dona plu zoa, te, po moti epi mu, mu fu fero Paulo a landa-cefa Felix. 25 An grafo u grama per u-ci mode: 26 "Klaudio Lisia a maxi krati landa-cefa Felix: Saluta. 27 "Po an gene rapi ex plu Juda-pe e gene prepara te akti cide ex mu, mi, po ki ko plu soldata e po gene ski; an es u Roma-pe, pa salva u-ci andro. 28 "Tem volu ski un etio; kausa qi mi dona judika ad an, mi duce an a mu koncili. 29 "Mi detekti; an gene etio kausa plu qestio de mu lega, anti-co u judika habe zero merito de morta alo de liga. 30 "Po gene dice de skema anti an; de qi plu Juda-pe sti prepara, mi bali un andro a tu, po dice u komanda; plu dona-etio-pe dice u-la anti an ante tu. Vale." 31 Ka-co, akorda plu komanda e po kapti an, plu soldata duce Paulo a civita Antipatris tem noktu. 32 Po lase; plu Equs-soldata ki kon an, mu ki versi forti-do. 33 Po ki a civita Cesarea e po dona u grama ad an, mu dona an a landa-cefa. 34 Po lekto e po dice u qestio; an es ex qo landa, e po gene u ski; an es ex landa Cilicia, 35 u landa-cefa dice: "Mi fu audi tu po plu dona-etio-pe anti tu veni." 36 An dona u komanda; an gene tena in Herode tribuna.

24

1 Po penta di, un arki-hiera Anania ko plu krati-pe e u certa dice-pe Tertulo; qi dona info anti Paulo a landa-cefa. 2 Po gene veni, Tertulo proto dona etio tem dice: 3 "Tem gene mega paci per tu e tem plu grandi-ra gene face ad u-ci landa kausa tu pre-puta, na cepti u-ci ko panto gratia, maxi krati Felix. 4 "So mi ne fu du es u non-auxi a tu, mi dice u petitio; tu fu sti audi na per tu arki. 5 "Ka na detekti pesti u-ci andro, tem an sti anti-krati inter panto Juda-pe in holo kosmo e es u duce-pe de kripto religio de Nazaret-pe. 6 "An; na pa rapi, pa tenta falsi-dice u religio-do. Na pa volu akti judika akorda na lega. 7 "Po ki proxi, u kilo-kapitana Lisia pa duce an per mega dina ab na 8 "po dice u komanda; plu dona-etio-pe sti veni a tu. Po akti examina de panto-ci, tu auto fu habe u pote; gene ski de ra; de qi na dona etio ad an." 9 Plu Juda-pe dice ja tem voci; panto-ci es so. 10 Po face u sema de dice a landa-cefa, Paulo reakti: "Tem habe u ski; tu pa es u judika-pe de u-ci landa tem poli anua, mi dice alexi de mi ko tali ma hedo. 11 "Tu pote gene u ski; es a mi ne ma de mo-bi di po ki a civita Jerusalem te akti latri. 12 "Mu pa detekti mi ni in cefa religio-do tem dona logika ad uno-pe alo ni in turba tem face u poli-pe ni in plu hetero religio-do alo ni in civita. 13 "Mu ne pote verifi u ra; de qi mu nu dona etio a mi. 14 "Mi dice a tu u konfesi; per u mode; a qi mu dona u nima 'kripto religio', so mi dona servi a Teo de na plu patri tem habe kredi de panto-ra; qi pa gene grafo akorda na lega ex plu profeta 15 "e tem habe in Teo u spe; de qi mu auto habe kredi: fu es un ana-sta de panto morta-pe--de plu justi e de plu no-justi. 16 "Mi auto akti ergo per u-ci te dura habe auto-kritici minus mali anti Teo e anti panto homo. 17 "Po poli anua, mi pa veni tem fero plu doro e plu sakrifice pro pove-pe de mi demo. 18 "Tem u-ci mu pa detekti ge-puri mi in cefa religio-do ni ko poli-pe e ni ko turba. Plu certa Juda-pe ab landa Asia-Minor 19 "fu debi monstra se ante tu e dona etio, si mu posi habe ali-ra anti mi. 20 "Alo lase; mu auto dice, si mu pa detekti ali no-justi in mi, tem mi sta inter koncili-- 21 "excepti u-ci mo dice; mi voci tem sta inter mu: 'Mi gene judika ex tu de ana-sta de panto morta-pe nu-di.'" 22 Po audi, Felix moti panto-ci a latu tem habe ma exakti ski de u-la mode e tem dice: "Po u kilo-kapitana Lisia veni, mi fu akti examina de plu ra akorda tu." 23 Po dice ad hekto-kapitana u komanda; tena Paulo, an lase u libe; veto; nuli-pe ex an idio-pe dona servi alo veni ad an. 24 Po plu certa di e po veni kon an gina Drusila; qi es u Juda-fe, Felix sti veni Paulo e audi an de fide a Kristo. 25 Tem an dice logika de justi e de auto-krati e de fu-tem judika, Felix, tem este fobo, reakti: "Ki nu-tem. Po detekti un okasio, mu fu sti veni tu." 26 Plus an habe u spe; valuta fu gene dona ad an ex Paulo, so an fu sio lase laxa an. Ka-co, tem sti veni an ma freqe, an dice konversa kon an. 27 Po bi anua gene fini, Felix cepti u seqe arki-pe Porcio Festo. Tem volu gene favo a plu Juda-pe, Felix linqi ge-liga Paulo.

25

1 Ka-co, po ki a landa mero, Festo pa ki a civita Jerusalem ab civita Cesarea po tri di. 2 Un arki-hiera e u proto-pe de panto Juda-pe dice info anti Paulo ante an e tenta 3 dice anti an u petitio; an bali an a civita Jerusalem, tem u grega du atende te cide an longi via. 4 Ka-co Festo reakti; Paulo fu gene tena in civita Cesarea. An auto es prepara te sti ki. 5 "Ka-co,"--an dice--"po ki ko, si ali-ra es in u-ci andro, plu-la arki-pe inter vi fu dice etio anti an." 6 Po resta inter mu ma de deka di e po ki a civita Cesarea e tem sedi epi judika sedi-mo seqe di, an dice u komanda; Paulo gene duce. 7 Po veni e po plu Juda-pe; qi pa ki ab civita Jerusalem tem dice anti an poli gravi etio; mu ne pote demonstra, 8 Paulo dice alexi: "Mi pa akti peka ni anti Juda lega ni anti religio-do ni anti Cesari." 9 Tem volu gene favo pro se ko plu Juda-pe, Festo dice tem reakti a Paulo: "Po ki a civita Jerusalem, qe tu fu volu gene kritici de panto-ci ante mi la?" 10 Paulo dice: "Mi du sta ante judika sedi-mo de Cesari; topo mi debi gene judika. Mi pa akti zero no-justi a plu Juda-pe. Tu du fo ski u-ci. 11 "Ka, si mi veri pa akti no-justi e morta-merito, mi ne fu nega morta. Si es zero ra; de qi mu dice etio anti mi, nuli-pe fu pote duce mi a mu. Mi akti petitio a Cesari." 12 Po dice ko koncili, Festo reakti: "Tu pa akti petitio a Cesari--tu fu ki a Cesari."

13 Po spende plu certa di, regi Agripa ko Bernice ki a civita Cesarea tem dice saluta a Festo. 14 Po mu du resta la tem poli di, Festo dona info de Paulo ad u regi tem dice: "U certa karcera-an pa gene linqi ex Felix. 15 "Tem es in civita Jerusalem, plu arki-hiera e krati-pe de plu Juda-pe dice info de an tem dice u petitio de judika anti an. 16 "Mi pa reakti a mu; plu Roma-pe ne more cede ali homi a destru, pre u gene-judika-pe fu dice a facia de dona-etio-pe e gene okasio de alexi anti etio. 17 "Ka-co, po mu kolekti se ci e ne lento ki, tem u seqe di e po sedi epi judika-lo, mi pa dice u komanda; un andro gene duce. 18 "Plu dona-etio-pe dice anti an zero etio; de qi mi pa puta. 19 "Mu habe anti an plu certa qestio de auto barbaro religio e de u certa Jesu; morta sed Paulo forti dice vive. 20 "Tem este dubi de qestio mode de u-ci, mi dice; qe an volu ki a civita Jerusalem te gene kritici de panto-ci la. 21 "Po Paulo face petitio te tena se ad Augusto ski, mi dice u komanda; du tena an, a-kron mi fu bali an a Cesari." 22 Agrippa dice a Festo: "Mi auto volu audi un homi." An dice: "Fu-di tu fu audi an." 23 Ka-co, kron mana, Agripa ko Bernice veni ko mega grandi e ki a tribuna-ka tem plu kilo-kapitana e importa andro de civita es la. Po Festo dice komanda, Paulo gene duce. 24 Festo dice: "Regi Agripa e panto-pe; qi es ci kon andro na: vi vide u-ci homi; de qi un holo Juda poli-pe pa akti ko mi in civita Jerusalem e ci tem voci; an debi ne dura vive. 25 "Po detekti; an pa akti nuli-ra; qi habe u morta merito, e po an pa akti u petitio ad Augusto, mi pa decide bali an. 26 "Mi ne pa grafo ali sura ra a mi cefa. Ka-co mi duce an a vi e supra panto-ra a tu regi Agripa, so, po examina gene acide, mi fu habe u grafo. 27 "Ka feno ne-logika a mi: bali u karcera-pe, ko-co ne sti ski de etio anti an."

26

1 Agripa dice a Paulo: "Gene lice; tu dice pro se." Po-co, tem tensio manu, Paulo dice alexi: 2 "De panto-ra; de qi mi gene etio ex plu Jude-pe, regi Agripa, mi este valu, ka mi fu dice alexi ante tu nu-di. 3 "Supra panto-ra, tem tu habe ski de panto more e qestio inter plu Juda-pe, mi dice u petitio; tu audi mi ko tolera. 4 "Ka panto Juda-pe habe ski de mi bio ex juve; qi proto es in mi landa in civita Jerusalem. 5 "Ex proto, mu habe u ski; si mu pa sio dona testi, mi pa habe u bio akorda maxi severi mero de na religio: Farisai. 6 "Mi nu sta ge-kritici kausa spe de promise; ge-face ex Teo a na patri. 7 "De u-ci spe veni, na mo-bi tribu du servi ko tende tem noktu e di. De u-ci spe, mi gene etio ex plu Juda-pe, regi Agripa. 8 "Tu doxo ne-kredi de u-ci per qo mode, si Teo sti; plu morta-pe gene leva? 9 "Ka mi auto pa doxo; mi pa debi akti kontra-praxi ad u nima de Nazaret-pe Jesu. 10 "Mi akti mu in civita Jerusalem. Mi klude poli sakri-pe in karcera, po gene arki ex plu arki-hiera. Mi dona vota anti mu; qi gene cide. 11 "Tem freqe akti puni anti mu in panto Juda religio-do, mi sti per dina; mu dice falsi. Tem fo este fo-koleri anti mu, mi akti opresi anti mu klu a plu xeno civita. 12 "Tem-co e tem face viagia a civita Damasko ko krati e ko bali ex plu arki-hiera, 13 "kron meso-di, mi vide epi via, Regi, u foto; ma foto de heli e qi dona foto a mi ko plu viagia-pe. 14 "Po panto na pa kade a tera, mi audi u voka; qi dice a mi--klu dice per Hebreo lingua: 'Saul, Saul: tu akti opresi anti Mi qo-ka? Es no-facili: tu bate per pedi anti plu punge.' 15 "Mi dice: 'Tu es qo-pe, Cefa?' An dice: 'Mi es Jesu; anti qi tu akti opresi. 16 "'Anti-co sti sta. Sti sta epi poda. Ka Mi pa monstra Se a tu kausa u-ci: te elekti tu u servi-pe e u testi-pe de plu ra; tu pa vide e qi fu gene monstra a tu, 17 "'tem apo tu ex panto-pe--klu ex plu hetero demo; a qi Mi nu bali tu-- 18 "'te sti; mu oku gene aperi, te mu fu tropi se ab skoto a foto e ab Satan krati a Teo, te mu fu gene apo de peka e gene geneti-stato inter plu homi; qi pa gene sakri per fide a Mi.' 19 "Po-co, regi Agripa, mi ne tena no-obe ad u-la urani vista. 20 "Anti-co mi voci proto a plu Damasko-pe e a plu Jerusalem-pe e ad holo landa Juda e a plu hetero demo: dice penite e tropi se a Teo tem akti penite-merito ergo. 21 "Kausa panto-ci, plu Juda-pe, po rapi mi in religio-do, tenta cide mi. 22 "Ka-co, po gene auxi ex Teo, mi du sta ad u-ci di tem dice testi a pusi-pe e a mega-pe e tem dice zero hetero ra; sed Moses e plu profeta pa dice e qi fu gene acide: 23 "Kristo fu habe algo e, tem es proto-Pe ex ana-sta de morta-pe, fu voci foto a panto-pe--klu plu hetero demo."

24 Po dice panto-ci alexi, Festo dice per fo-soni voka: "Rabi, Paulo! Tu mega eduka tropi tu a rabi." 25 An dice: "Mi ne habe rabi, maxi krati Festo. Anti-co mi soni plu veri e no-kripto dice. 26 "Ka u regi habe ski de panto-ci, tem mi dice ko no-fobo a tu. Ka mi este u kredi; panto-ci ne es ge-kripto ab tu. Ka panto-ci ne pa gene akti in kripto-lo. 27 "Regi Agripa: qe tu habe fide a plu profeta? Mi du ski; tu habe fide." 28 "Agripa dice a Paulo: "Pusi-tem tu du sti; mi fu es u Kristo-pe." 29 Paulo dice: "Mi volu a Teo; per pusi alo per mega, ne solo tu sed panto-pe; qi audi mi nu-di, fu es homo mi minus panto-ci liga."

30 Po an dice panto-ci, u regi e u landa-arki-pe ko Bernice ko plu sedi-pe sti sta. 31 Po ki a latu, mu dice ad alelo tem dice: "U-ci homi pa akti nuli-ra ko merito de morta alo de liga." 32 "Agripa dice a Festo: "U-la homi posi gene libe, si an ne sio pa akti petitio a Cesari."

27

1 Kron gene decide: na fu ki per navi a landa Italia, mu dona Paulo e plu certa hetero karcera-pe ad hekto-kapitana; ge-nima Julio, de Augusto arme grega. 2 Po ki epi un Adramitiu navi; qi fu ki longi plu Asia-Minor loka, na sti veli, tem Aristarko; u Makedonia-pe ex civita Tesalonika, es ko na. 3 Tem seqe di, na sto veli in civita Sidon. Ko civili e po dona favo a Paulo, Julio lice; an ki a plu ami te gene kura. 4 Po sti veli ab la, na ki proxi insula Kipro, ka plu venti es kontra. 5 Po ki trans mari longi plu landa Cilicia e Pamfilia, na ki a civita Mira de landa Licia. 6 Po detekti un Alexandria navi; qi ki a landa Italia, un hekto-kapitana sti; na ki ad-in id. 7 Tem poli di e tem lento ki e tem u venti proxi ne lase; ki proxi civita Knido, na ki proxi insula Kreta ab peninsula Salmone. 8 Tem proxi ne ki longi id, na ki ad u certa loka; ge-nima Kali Asilu; proxi qi es u civita Lasaia. 9 Po mega tem gene spende e tem u viagia pre es risko e ka u sto-vora pre habe fini, Paulo dona monito a mu 10 tem dice: "Panto andro: mi este; u viagia fu gene poli defekti e lose ne solo de kargo e de navi sed de na bio." 11 Un hekto-kapitana gene kredi ma ex u duce-pe e un habe-pe dice de ex Paulo. 12 Tem u-la asilu es ne-gru te spende frigi-tem, u maxi qantita dice u konsili; sti veli ab la, so, po veni ad urba Fenika; un Kreta asilu; qi es a sud-uest e a nord-uest, mu posi spende frigi-tem la. 13 Tem u sud venti du fla e tem doxo; mu pa gene u tende, e po leva [ankira], mu lento ki longi insula Kreta. 14 Po brevi tem, u tempestu venti; ge-nima Euroklidu, ki kontra. 15 Po u navi gene rapi e tem na ne pote duce un ante-mero a venti tem cede, na gene duce. 16 Tem ki proxi certa insula; ge-nima Klauda, na proxi ne pote es duce-pe de navi. 17 Po prende plu korda, mu uti mu homo plu zona infra navi. Tem este u fobo; mu fu kade ad-in arena-lo Sirti e po lase kata u veli, mu gene duce. 18 Tem viole seiso tem seqe di, na pa akti jeti ex navi. 19 Tem di tri, na auto pa jeti ex navi plu nece-ra. 20 Po ni heli ni astro gene vista tem poli di e tem no-mikro tempestu es epi na, na spe de gene salva gene apo. 21 Po es longi sto-vora, Paulo, po sti sta in mu meso, dice: "Veri, andro vi, vi pa sio debi dona a mi obe; ne sti ki ab insula Kreta e gene u-ci mali-acide e lose. 22 "Mi nu dona a vi u spe; este hedo. Ka fu es zero lose de psiko ex vi sed solo de navi. 23 "Ka un angeli de Teo; de Qi es mi e a Qi mi dona servi, sta para mi nu-nokti 24 "tem dice: 'Ne este fobo, Paulo: tu nece sta para Cesari. Sti vide; Teo pa dona a tu panto tu viagia-pe.' 25 "Ka-co este hedo, andro vi. Ka mi habe kredi a Teo; so fu es akorda dice a mi. 26 "Na fu nece kade a certa insula." 27 Po u noktu mo-tetra veni po na gene duce in mari Adria e proxi meso-noktu, plu navi-pe doxo; mu ki proxi landa. 28 Po akti proba, mu detekti tetra-ze metra de bato. Po ki ma tele e itera akti proba, mu detekti tri-ze metra. 29 Tem este fobo de kaso; mu fu kade a petro loka, e po bali tetra ankira ex poste, mu volu; di sio gene proto. 30 Plu navi-pe tenta fugi ex navi e pa lase u pusi navi a mari ko postula; mu fu sio jeti plu ankira. 31 Paulo dice a hekto-kapitana ko plu soldata: "Si plu-la ne resta in navi, vi ne pote gene salva." 32 Po-co plu soldata seka plu korda de pusi navi e lase; id kade. 33 A-kron di fu gene proto, Paulo tenta sti; panto-pe vora sito, tem dice: "Nu-di es u di mo-tetra; tem qi vi skope e dura minus sito tem vora nuli-ra. 34 "Ka-co mi tenta sti; vi vora sito. Ka u-ci es pro sani. Ka zero kapila fu kade ex vi kefa." 35 Po dice panto-ci e po prende pani, an dice gratia a Teo ante panto-pe e, po frakti id, proto vora. 36 Po gene hedo, panto-pe auto vora sito. 37 Panto psiko na in navi es bi-seti-sixa. 38 Po gene sati per sito, mu face ma levia u navi tem jeti cereali Tritikum a mari. 39 Kron di gene proto, mu ne rekogni u landa. Mu gene vista de u certa baia ko litora; a qi mu tende--si mu fu pote--duce u navi. 40 Po seka, mu lase plu ankira a mari. Po face laxa plu tropi-ra banda e po leva u veli a venti, mu sti ki a litora. 41 Po kade a loka; topo bi mari gene enkontra, mu sti; u navi ki epi tera. Po gene fixa, un ante resta no-kine. U poste gene frakti per unda viole. 42 Plu soldata konsili es mu fu cide plu karcera-pe kaso uno-pe, po nekto ab, fu gene libe. 43 Tem volu dona salva a Paulo, un hekto-kapitana dona non-auxi a mu tende e dice u komanda; nekto-pote-pe, po jeti se ab navi proto-kron, fu ki epi tera, 44 e po-co plu resta-pe; veri, uno-pe epi taba e uno-pe epi certa peci de navi. So gene acide: panto-pe gene fugi epi tera.

28

1 Po gene salva, kron mu ski; un insula habe u nima Melita. 2 Plu barbaro-pe monstra non-ordinari civili a na. Ka, po face piro, mu cepti panto na kausa u-la pluvi e kausa frigi. 3 Po Paulo kolekti poli baci e po moti epi piro, u toxi serpenti, po ki ex termo, fixa se epi manu. 4 Po vide u zoa; pende ex manu, mu dice ad alelo: "Sura, u-ci homi es u cide-pe. Po gene salva ex mari, justi ne lice; an es vive." 5 Veri ka-co, po seiso u zoa ad-in piro, an este nuli kako. 6 Mu expekta; an fu gene brio alo fu kade subito morta. Longi-tem expekta e vide; zero no-norma gene acide ad an, tem muta doxo, mu dice; an es u teo. 7 Nu-kron, es plu landa; qi es de u cefa de insula ko nima Poplio; qi, po cepti na kon ami, dona eko. 8 Acide: u patri de Poplio, tem gene opresi per febri e disenteri, du kumbe. Po ki ad an e po preka e po moti manu epi an, Paulo sti repara an. 9 Ka-co, po u-ci pa gene acide, plu hetero-pe; qi habe pato in insula, veni e gene repara. 10 Mu dona poli honora a na. Po fixa ana veli, mu dona kargo epi navi pro na nece.

11 Po tri meno, na ki in navi de Alexandria ko sema de [gemini-teo] Dioskuri; qi pa spende frigi-tem topo insula. 12 Po gene veni a civita Sirakusa, na es la tem tri di. 13 Po ki peri, na veni a civita Regiu. Po mu di e po gene u sud venti tem di bi, na veni a civita Puteoli. 14 Po dektekti la plu asocia, na gene u petitio; es la tem seti di. So na veni a civita Roma. 15 Ab la plu asocia, po audi uno-ra de na, veni ad unio ko na a marketa Apio e a civita Tri-Taberno. Tem vide mu e po dona gratia a Teo, Paulo gene koragi. 16 Kron veni a civita Roma, un hekto-kapitana dona plu karcera-pe ad arme kapitana. Paulo gene lase es solo ko mo arme-pe; qi tena an.

17 Acide po tri di: Paulo sti veni plu Juda proto-pe. Po veni simul, an dice a mu: "An-asocia vi: po akti nuli-ra anti panto-pe alo anti na patri more, mi; u karcera-pe ex civita Jerusalem, pa gene dona a manu de plu Roma-pe. 18 "Po dona examina a mi, mu volu lase ab, ka es ne mo kausa de morta in mi. 19 "Tem plu Juda-pe dice anti u-ci, mi debi akti petitio a Cesari tem habe nuli etio anti mi demo. 20 "Ka-co, pro u-ci kausa, mi sti veni vi te vide e dice a vi. Ka, kausa spe pro [demo] Israel, mi habe u-ci katena peri mi." 21 Mu dice ad an: "Na ni pa gene plu grama de tu ab landa Juda, ni, po veni, uno asocia po dona nova alo dice de uno kako de tu. 22 "Na volu audi ex tu u ra; tu puta. Ka, veri, na habe u ski de u-ci xeno kredi; id gene dice anti se panto-lo." 23 Po taxo u di, poli homi ki ad an in domi. An sti explika a mu tem dona testi de Teo regi-landa e tem tenta sti kredi in mu de Jesu ex Moses lega e ex plu profeta tem mana a vespera. 24 Veri, plu homi gene u kredi de plu dice, sed plu hetero-pe ne gene fide. 25 Tem dice disputa ad alelo, mu ki ab, po Paulo dice mo ra: "Sankti-Spiritu dice per profeta Isaia a na plu patri u kali 26 "tem dice: '+Sti ki ad u-ci homi e sti dice: "Per audi, tu audi sed gene logi per nuli mode. Per vide, tu vide sed gene logi per nuli mode. 27 "'"+Ka u kardia de panto-pe pa gene mega kausa lipo. Per ne-interese oti, mu audi. Mu pa klude oku. Si mu ne vide per oku e ne audi per oti e ne gene logi per kardia, mu ne gene muta, ko-co Mi ne sti repara mu.+"' [Isaia 6:9,10] 28 "Ka-co gene a vi u ski; Teo salva gene bali a plu hetero natio, ko-co mu audi." 29 Po audi panto-ci, plu Juda-pe ki ab tem dice tem habe poli disputa inter se. 30 Paulo du eko tem bi holo anua in idio tem-paga domi. An cepti panto-pe; qi veni ad an 31 tem voci sko de Teo regi-landa e tem dona doci de na Cefa Jesu Kristo per holo no-sto libe.

Advertisement