U mode; u milita ko civita Troja pa gene proto[]
Kron, pa es un an-regi de civita Sparta. An habe u fo kali fe-fili ko nomina Helena. Pan regi an-fili de natio Elada volu gene game a fe. U regi dice: "Sti logi! Pan vi debi dice u jura; vi fu es boni ami de andro; mi fili gene iso sposa. Plus si un andro habe ta kako; an akti klepto fe ab an, vi fu dona auxi, tende an fu re gene fe." Mu pa akti u-ci ra. Po-co kali Helena pa gene u regi fili Menelao; un an-sibi de Agamemnoni; qi es regi de civita Micena, e es duce-pe de pan regi de natio Elada. Po-kron un an-parenta de Helena lose bio. Fe sposa gene es u regi de civita Sparta. Bi mu este hedo de alelo, a kron u juve regi an-fili ko nomina Paridi; qi es u fili de Priamo; u regi de civita Troja. Paridi pa apo kali Helena, ko fe plus mega metri kriso e poli fo-valu orna-li.
Menelao ko sibi Agamemnoni sti; plu bali-pe kine a pan regi fili de landa Elada; qi dice: "Ci-kron, vi debi sti ple u jura, e dona auxi, tende re duce u kali Helena a ci." Seqe-co pan mu ko poli navi e milita-pe kine a loka ko nomina Auli. Plus homi; qi ne pa dice u jura, kine ko mu. U maxi boni de pan-ci duce-pe es: Diomedi an-fili de Tideo, ma grandi Ajaci e mei grandi Ajaci, sagita-an Teucer; qi es u sibi de ma grandi Ajaci, Nestori; qi es u maxi paleo andro de holo Geo, sofi Ulixeo, Akileo; qi es u maxi koragi e resista andro de pan Eleda civi, e kon an u karo ami Patroklo.
Nona anua, plu Elada-pe sti klude u civita Troja. Anti-co mu ne pote sti frakti plu mura. Kausa mu es tele ab nati landa holo tem, mu gene mega desira de vora-ma e vesti e poli plus ra. Seqe-co mu lase u mero de arme, tende akti skope de civita, e kine peri la, e klepto de plu hetero civita. Kausa-co u mega kolera diskusi gene proto; de qi mi nu-fu dice.